BETYIʼI MEJÔ 8 - Kalate Zambe Nnomo a Mfefe Mfefé Nkôñelan

Bôte ya Efrayim ba wô'ôlun

¹ Nde bôte y'Efrayim be nga jô nye na: Avale mboone di e mfa'a wongan da liti aya? Amu jé ô nji loone bia éyoñ ô nga ke wosane bôte ya Madian? Nde ngule meluman é nga boban e zañe jé a be.

² Ane a nga yalane be na: Jé me boya é veka'ane mia? Ye metôka'a bibuma ya Efrayim me nji dañe nkolane bibuma bi ndi'i woone ya mvô'ô Abiézer'

³ E mo menan mme Nti a te ve bivete ya Madian: Oréb baa Zib. Jé ma te bo a dañe mia? Eyoñe Gédéoñ a nga kobô nalé, ane ayaa dap e nga voé.

Ntôñane bôt ba tub e Yordane yat

⁴ Ane Gédéoñ a nga kui Yordan a dañe nye, émien a bôte mintete mila ba be nye be mbe, nte'an, ve be kele ôsu a tôñe bôt.

⁵ Nde a nga jô bôte ya tisone Sukôte na: Ma ye'elane mia na mi ve e bôt be ne nsamba wom bifuse bi belet amu be nto nte'an a ma tôñe Zéba ba Salmuna, bejô bôte ya Madian.

⁶ Bivete ya Sukôt bi nga yalane na: Ye Zéba a Salmuna be ntoo éjôé si jôé ane bi ne ve nkane bita wôé bidi'

⁷ Eyoñe te Gédéoñ a nga jô na: Mvo'é! v'éyoñe Nti a ye ve Zéba a Salmuna e mo mam, ma ye nyabe minsône mienan a biyo ya *nkôte si a minsinik.

⁸ Akôlô ya valé a nga ke e Penuél a sili bôte ya tison éte avale jame da. Ane bôte ya Penuél be nga yalane fe avale ba ya Sukôt be nga yalan.

⁹ Nde fe a nga jô bôte ya Penuél na: Éyoñ ma ye bulane *mvo'é, ma ye tyam nkum ya tisone jenane wu.

¹⁰ Zéba a Salmuna be mbe e karkor a nkane bita wop, bebé bôte toyini awôm a étan. Ba bese be nga li'i e nkane bita ya bone ya jôb da tôô, amu bezimbi ntete toyini a mewôm mebaé be nga wôéban.

¹¹ Nde Gédéoñ a nga tôñe zene betabe menda bindelé e Nôba a Yôgbeha mfa'a jôb da tôô, nde a nga bôé minkane besiñ be nga buni na jam éziñe ya ko woñ e nji ke bo.

¹² Ane Zéba a Salmuna be nga tup; Gédéoñ kik ve zu tôñe be, nde a nga bi be bebaé a ngume nkane bita ô nga tyamelan.

¹³ Ane Gédéoñ e mona Yôas a nga so bita a tôñe zene ja bete Erés.

¹⁴ Nde a nga bi ésoé ndôman e nsamba bôte ya Sukôt été a sili nye minsili, ane a nga liti nye a *zen ya ntilan, môé bivet a bemvendé ya Sukôt tañe bôte mewôme zamgbwa a zamgbwa.

¹⁵ Eyoñe te a nga zu vôme bôte ya Sukôt be mbe a jô be na: Zéba ba Salmuna mbe ba, mi nga kobô m'ébiasé a ta ma a ajô dab mi jô'ô na: Ye Zéba a Salmuna be ntoo éjôé jôé si ane bi ne ve bôte bôé be ne nte'an bidi'

¹⁶ Nde a nga nyoñe bemvendé ya tison, a nyoñe fe biyo ya *nkôte si a minsinik a belane bie mfa'a ya ve bôte ya Sukôt *melep.

¹⁷ Ane fe a nga tyam nkume ya Penuél a wôé bôte ya tison.

¹⁸ A nga jô Zéba a Salmuna na: E bôt mi nga wôé e Tabor be mbe beza? Nde be nga yalane na: Be mbe ane wo, môt ase y'été a nga funane mona njô bôt.

¹⁹ Ane a nga jô be na: Be mbe bobejañ, bone be nyia wom. Ane Nti a vee! Nge mi nga ye li'i be bevevee, me nji ke ye wôé mia.

²⁰ Nde a jô Yéter, e ntôle mone wé na: Kôlô'ô si, a wôé be! Ve ndôman éte é nji ke té nkpwaté mekône wé, amu a nga ko woñ, amu valé a ngenane fo'o v'ésoé môt.

²¹ Ane Zéba a Salmuna be nga jô na: Womien kôlô'ô si a wôé bia! Amu avale môt a né, nalé fe e ngule jé é né. Nde Gédéoñ a nga kôlô si a wôé Zéba ba Salmuna. Ane a nga nyoñe fe bityé bi mbe ane éfase ngon bi nga tyele bekamele babe *tyiñ.

Gédéoñ a ben éto njôô

²² Ane bôte y'Israél be nga jô Gédéoñ na: Jô'ô bia, womien e mone wôé a ndaé jôé, amu ô nyiiya bia e wo bôte ya Madian.

²³ Gédéoñ a nga yalane be na: Maa ye ke jôô mia, nge mone wom, Nti nye a ye jôô mia.

²⁴ Gédéoñ a nga jô be na: Me bili jam ya sili mia, môt ase ya be mia a va'a ma bilondo ya biôm a nga sa (amu besiñe bab be nga bili bilondo bi or, amu be mbe Beismaélite).

²⁵ Nde be nga jô na: Bia ye ve bie a mbamba minlem. Ane be nga bôé éndelé si a môt ase a nga wua élondo ya biôm a nga sa été.

²⁶ Adite ya bilondo bi or Gédéoñ a nga sili e mbe bebé kili mewôm mebaé. Te lañe bityé bi ne ane éfase ngon, biôm bimvônga bia ndeñe melo a mengômesan me velvese bejô bôte ya Madian be nga be'e a minsanga mi mbe e tyiñe bekamele bap.

²⁷ Nde Gédéoñ a nga belane biôm bi or bite asu ya bo éfôd nje a nga telé e tisone jé, Ofra, éfôde te é nga su'ulane bo jôm y'ébamba e b'Israél ase; é too fe ôlam e mfa'a Gédéoñ a e *nda jé.

²⁸ Ane Madian a nga silibane si asu bone b'Israél, te ke beta bete nlô. Si é mbe évôvoé tañe mimbu mewôm menyin nté ôse Gédéoñ a nga vee.

²⁹ Ane Yérubal, e mona Yôas, a nga bulan a tabe e *nda jé.

³⁰ Gédéoñ a nga biaé bobefam mewôme zañgbwa, mbiane wé, amu a nga bili abui binga.

³¹ Ebone jé é mbe Sikém é nga biaé fe nye monafam nye a nga yôlé na Abimélek.

³² Gédéoñ, e mona Yôas, a nga wu a ntoo fo'o mbamba nnôme môt; be nga jame nye Ofra, e soñ ésa wé Yôas, nlame mvô'ô Abiézer.

Abimélék a wôé bobenyañ, e bobefame be Gédéoñ Abimélék a telébane njôô e Sikem

³³ Eyoñe Gédéoñ a wuya, bone b'Israél be nga beta taté na ba bo ébamba a bebal; nde be nga nyoñe Bal-Berit ane *zambe wop.

³⁴ Bone b'Israél be nji fe simesane Nti, e Zambe wop. Nyô a nga kôté be e wo ya besiñe bese be nga bômane be.

³⁵ A be nji ke yeme mvaé Gédéoñ a nga bo be a liti nalé e mfa'a ya *nda bôte jé, nyô a mbe jôé afe na Yérubal.