BETYIʼI MEJÔ 7 - Kalate Zambe Nnomo a Mfefe Mfefé Nkôñelan

Gédéon a dañe Bemadianite

¹ Mametyé, nde Gédéoñ a ne jôé afe na Yérubal, a nga wulu a minsamba mié, nde be nga ke vule minkan bebé anjeñe Arôd. Minkane Bemadianite mi mbe mfa'a y'akôé, e nje'ese, e mfa'a ya nkôle Môré.

² Ane Nti a nga jô Gédéoñ na: E bôt ô bili ba dañ abui asu ya na me ve bôte ya Madian e mo map; Israél a za nyoñe duma a ke ma ngame yat a jô na: E wo wom ñwô ô nyiiya ma.

³ Ajô te miala'ane foé nyô e melo me bôte na: E bôte bese ba fô'ôban a woñ be kele ôyab a nkôle Galad a bulane menda map. Nde bôte toyini mewôm mebaé a ébaé be nga bulan a awôme toyini da nde e nga li'i.

⁴ Nde Nti a nga jô Gédéoñ na: Bôt be ngenan étua abui. Kele be vôm mendim me né, éyoñe te ma ye jô wo na: Nyôna a ye ke e nsamba wôé, mia nye mia ye ke; a môt ase ma ye jô wo na: Nyôna a bo'o te ke e nsamba wôé, mia nye mia ye bo te ke.

⁵ Nde a nga kee bôt e mendim, a Nti a nga jô Gédéoñe na: E bôte ba ye nyu mendim a ôyem ane mvu, telé'é be e fefele, nkandan a ba bese ba ye kute meboñe si mfa'a ya nyu mendim.

⁶ Ba be nga nyu mendim a ôyem a zuu me anyu a mo mab be mbe bôte mintete mila, a e bôte bevo'o bese be nga kute meboñe si mfa'a ya nyu mendim.

⁷ Nde Nti a nga jô Gédéoñ na: Ma ye nyii mia a ve bôte ya Madian e mo menan v'a bôte mintete mila be nga nyu mendim a ayeme dap. Bôte bevo'o bese be bula'an môt ase e *nda jé. Nde be nga nyoñe menga'aban a metoñe bôt be nga bili e mo.

⁸ Ane Gédéoñ a nga suu bôte bese y'Israél môt ase e *nda éndelé jé a li'i a bili ve bôte mintete mila. Minkane mi bôte ya Madian mi mbe nye e mbi'ili si.

⁹ Nti a nga jô Gédéoñ alu te na: Kôlô'ô si, ô sis e minkan, amu me veya nye be e mo môé.

¹⁰ Nge wo ko woñ ya sis, mia Pura, mbo ésaé wôé a ne fam, kelan.

¹¹ Wo ye vô'ôlô jam ba ye jô e mvuse valé, mo môé ma ye yeme ngu; ajô te kele minkan. Nde baa Pura, mbo ésaé wé a ne fam be nga ke a kui metata'a minkan.

¹² Madian, Amalék a bone bese ya jôb da tôô, be nga jaé e mbi'ili ane ézu'u bitandak, a bekamele bab be mbe teke alañé, ane nselek ô ne nsa'a mañ.

¹³ Nde Gédéoñ a nga suan a koone na môt éziñ a kañete'e mvôé jé biyeyem a jô'ô na: Ma te yem biyeyem mbubane belet é ne mboon a avute fôn ô bi'iti'i e minkane ya Madian; éyoñe te mbubane belete ôte wo te zu kui *nda éndelé a jimbi je, ane ja te ku a bulekan.

¹⁴ Nde mvôé jé ja yalane na: Jam afe e nji bo été ve nkpwaté mekône Gédéoñ, e mona Yôas, môte y'Israél; Zambe a veya Madian a minkane mié mise e mo mé.

¹⁵ Eyoñe Gédéoñ a nga wô'ô nkañete ya biyeyem a nkulan y'été, nde a nga kute meboñe si, a bulan e minkan y'Israél a jô na: Kôla'ane si amu Nti a veya minkane ya Madian e mo menan.

¹⁶ Ane a nga kabe bôte mintete mila tañe minsamba mila a kalane be bese metoñ a bikôkoé mevie'e m'ékon, ngôé é too e mevie'e été.

¹⁷ Nde a nga jô jô be na: Mia ye fombô ma a bo fe ane ma bo. Eyoñ ma ye kui bebé mefôla ya minkan, mia ye bo e jam ese ma ye bo;

¹⁸ a éyoñ ma ye loñe toñ, ma a bôte bese bia be be bi ne nsamba, mia fe mia ye loñe toñ mbôma'ane a minkan a mia ye jô na: Asu Nti a asu Gédéoñ!

¹⁹ Gédéoñ a bôte ntet ba be be be mbe nsamba be nga kui bebé mefôla ya minkan, bebé e zañ alu. Ane be nga loñe metoñ a bôé meviek m'ékon be nga bili e mo.

²⁰ Nde minsamba mi bôte mila mi nga loñe toñ a bôé mevie'e m'ékon; ane be nga bi ngôé e wo ya mbo nga a metoñ e wo ya mbo nnôm mfa'a ya loñ a be nga yôtane na: Nkpwaté mekôn asu Nti, a asu Gédéoñ!

²¹ Be nga tebe môt ase e vôme wé, mbôma'an a minkan, a bôte bese ya minkan be nga mate, a yôn, a tup.

²² Ane bôte mintete mila be nga loñe metoñ a, e minkan été, Nti a nga kôñelane minkpwaté mekôn miab a bo na mi ya bôte ba mi wosane bôte bevok. Ane bôte ya minkan be nga tub a kui Bét-Sita, e mfa'a ya Seréra, a kui mefôla ya Abél-Mehôla, bebé a Tabat.

²³ Ane bôte y'Israél be nga sulan be so'o Néftali, Azér a Manasé ase, nde be nga tôñe bôte ya Madian.

²⁴ Ane Gédéoñ a nga lôme bôt e minkôle mise y'Efrayim a jô na: Za'a tôbane Madian a nyoñe mevôm mendim me né éyoñ be be ngenan te kui valé, a kui Bét-Bara a Yordan. Ane bôte bese y'Efrayim be nga sulan a nyoñe mevôm mese mendim me né a kui Bét-Bara a Yordan.

²⁵ Be nga bi bivete bibaé ya Madian: Ôréb a Zib, be nga wôé Oréb akôme Oréb, a wôé Zib émiate bibuma ya Zib. Be nga titane bôte ya Madian a zu kee Gédéoñ minlô mi Oréb baa Zib e kindi'i Yordane yat.