BETYIʼI MEJÔ 6 - Kalate Zambe Nnomo a Mfefe Mfefé Nkôñelan

Madian a liti Israél njuk

¹ Ane bone b'Israél be nga bo mam me n'abé e mise me Nti; nde Nti a nga ve be e mo me bôte ya Madian tañe mimbu zamgbwa.

² Wo bôte ya Madian ô nga dañ Israél ngu. A amu bôte ya Madian bete, nde bone b'Israél be nga fa'a bebien beta mimfule ya tabe e minkô, a tabe mimbase bekok a mevôm mese me n'ayaé ya kui.

³ Eyoñ ése bone b'Israél be nga bé bidi e mefup, Bemadianit, Beamalésit a bone ya e mfa'a jôb da tôô, be nga zu wosane be.

⁴ Be nga vule minkan bebé a bone b'Israél, a ndamane bidi be nga bé si a kui Gaza; be nji li'i jôm éziñ Israél: To'o bidi, to'o mintômba, to'o benyak, to'o bijakas.

⁵ Be nga zu a mimbame miap, a menda bindelé map, abui v'ane bitandak: be mbe étua abui, bebien a bekamele bab teke alañé. Be nga nyiin e si y'Israél a ndaman biôm bise y'été.

⁶ Ajô te mbia azoé a nga kui e be bone b'Israél amu mboone bôte ya Madian ôte. Ane bone b'Israél be nga yône be Nti.

⁷ Eyoñe be yôneya nalé, nde Nti a nga lôme be nkulu mejô

⁸ a jô be na: avale di nde Nti, Zambe y'Israél, a jô na: me nga soo mia Ejipte a vaa mia e *nda belo.

⁹ Me nga kôté mia e wo bôte y'Ejipte a e wo bôte bese be nga tibili mia; me nga titane be ôsu vienan a ve mia si jap.

¹⁰ Me nga jô mia na: Me ne Nti, e Zambe wônan: ajô te mia ye bo te ko bezambe Beamorééñ woñ mbe mi too si jap, ve mi nji ke wô'ô tyiñe jam.

Zambe a ve Gédéoñ ésaé ya nyii Israél

¹¹ Eyoñe te Éngele Nti a nga so a tabe élône ya Ôfra si e be Yôas ya mvô'ô Abiézer. Gédéoñ, e mone wé a mbe a tya'a nlisi e vôm ba miate bibuma mfa'a ya solé nye bôte ya Madian.

¹² Nti a nga yené be nye a jô nye na: Nti a ne be wo a wo éwôlô mben!

¹³ Ane Gédéoñ a nga jô Éngele na: A monti, nge Nti a ne be bia, amu jé e mam mana mese me nga kui be bia? Nalé fe na bitua bi mam bié bise b'ésaa bangan ba kañete bia bi ne vé, éyoñ ba jô na: ye Nti a nji vaa bia Ejipte? V'éyoñe ji Nti a li'iya bia a ve bia e mo bôte ya Madian!

¹⁴ Nde Nti a nga kôñelane be nye a jô na: Kelek a ngu ô bili le a wo ye nyii Israél e mo me bôte ya Madian; ma ma lôme wo.

¹⁵ Nde Gédéoñ a nga sili na: A Monti ma ye nyii Israél a jé? amu abume bôte dam da dañ éngôngo e Manasé été, a ma ma dañe mongô e *nda bôt ésaa wom.

¹⁶ Ane Nti a nga yalane nye na: Ma ye tabe be wo a wo ye dañe bôte ya Madian aval ane nge be ne ve môte wua.

¹⁷ Nde a nga yalane nye na: Nge me yeneya *mvam e mise môé, va'a ma ndeme na wo fo'o wo kobô ma.

¹⁸ Ajô te te kôlô va ma ye'elane wo, akekui me beteya zu koone wo, ma ye soo mvean a bôé wô ôsu viôé. Nde éngele a nga jô na: Ma ye tabe akekui ô soya.

¹⁹ Ane Gédéoñ a nga ke kôme mon ékela a bone be belet be nji bo mvusan ñyaman a kili avut mewôm mela. A nga futi tit e mone nkoé été a mendim bibuma e nde'e été, nde a zuu biôm bite élône si, a liti bie éngele Zambe.

²⁰ Nde éngele a nga jô nye na: Kele bôé tit a belet akôme dili yôp, wôna wo ye sôé mendim bibuma été yôp. Ane Gédéoñ a nga bo nalé.

²¹ Ane éngele Nti a nga same wo a nambe tit a belet a aku'u ya *ntum a nga bili; nde nduan é nga vam akôm a di'i tit a belet. Eyoñe te Engele a nga jañ nye mis.

²² Ane Gédéoñ a nga yeme na Engele Nti le: Nde a nga yôn a jô na: Ngo'o ma, a Tate Zambe! Amu me kômeya yene Engele wôé mesu mesu!

²³ Ve Nti a nga jô nye na: Tabe'e *mvo'é, te ko woñ, woo ye ke wu.

²⁴ Ane Gédéoñ a nga lôñe Nti ata'a metuna'a vôm ate a yôlé de jôé na: Nti a ve *mvo'é. Ata'a metuna'a te e ngenan a kui éyoñe ji Ofra, e nlame ya mvô'ô Abiézer.

1 S. 7:3; Sam. 40:9-12, 14-18

²⁵ Alu te ebien nde Nti a nga jô Gédéoñ na: Nyoñ étoñe nnôme nya'a ésoo, a e nnôme nya'a baa a too mimbu zamgbwa. Wo ye tyam ata'a metuna'a bal ésoo a ba'é akôn Aséra e n'été yôp.

²⁶ Eyoñe te wo ye lôñ a kôm ata'a metuna'a Nti, e Zambe wôé, e vôm a ne ngul ate e yôp.

²⁷ Ane Gédéoñ a nga nyoñe bôt awôm e bebo bisaé bé été, a bo avale Nti a nga jô; v'amu nkoone *nda ésaa woñ a bôt be too tison, a nji ke bo jame te a amôs, a nga bo de a alu.

²⁸ Eyoñ bôte ya tison be nga kôlô si ndibe tyé, be nga koone na Ata'a metuna'a bal e kuya si, akôn Aséra e nga tele été yôb ke mba'an, ata'a metuna'a afe nlôñan a nnôme nya'a baa mveban e mimvean mi ne ngumba e mfefé ata'a metuna'a te yôp.

²⁹ Nde be nga silane minsili môt ase e be nyô mbo'o na: Za a te bo jame di? Ane be nga ke ba yemelan a jeñ, nde be nga yalane be na: Gédéoñ e mona Yôas, nye a nga bo jame te.

³⁰ Ane bôte ya tison be nga jô Yôas na: Kuli'i nyo mon atan a wu: Amu a kpwéya ata'a metuna'a bal si a ba'é akôn aséra da too été yôbe a kpwé de si.

³¹ Nde Yôas a nga yalane ba bese be nga tele nye bebé na: Ye mia mia yiane suñ ajô bal? Ye mia mia ye nyii nye? Môt ase a ye suñ ajô bal a ye wu te na tyé é lendé. Nge bal a ne Zambe, émien a tame suñ ajô dé, amu be sô'ôlôya ata'a metuna'a dé si.

³² Môs ôte be nga yôlé Gédéoñ jôé na Yérubal, ôsimesan ô too na: Bal a tame suñ ajô dé e be nye amu a nga sô'ôlô ata'a metuna'a dé si.

³³ Ane Madian ase, Amalék a bone ya jôb da tôô be nga sulan, a dañe Yordan a Vule minkan e mbi'ili Yizrél.

³⁴ Gédéoñ a mbe njalan a nsisime Zambe; ane a nga loñe toñ, a loone mvô'ô Abiézer be tôñe nye mvus.

³⁵ Minlôman mi nga ke fe be Manasé ase na bôte ya wé fe be tôñe nye mvus. Avale te fe a nga lôme bôt e meyoñe ma: Azér, Zabuloñ a Néftali; bese be nga zu tôbane nye.

³⁶ Ane Gédéoñ a nga jô Zambe na: Nge wo kômbô nyii Israél a wo wom aval ô jôya, ô lôô:

³⁷ Ma zu bôé abusa mimvote di e si; mendim ma kui v'abusa mimvot étam, a éfuse si ése é li'i nkôt, ma ye yeme na wo ye nyii Israél a wo wom aval ô jôya.

³⁸ Nde nalé a nga boban. Mametyé a nga kune kôlô si a miate abusa mimvot a vaa mendim me ve jaé *élaé.

³⁹ Gédéoñ a nga beta jô Zambe na: Ayaa dôé e bo'o te yôñe ma nyô, ma ye kandane kobô v'éyoñe ji: Ma kômbô beta bi ndem a abusa mimvote di: Abusa étam nde e li'i nkôt, ve mfô nye a yiane si.

⁴⁰ Nde Zambe a nga bo nalé alu te: Abusa mimvot étam nde e mbe nkôt a mendim me nga yian éfuse si ése.