BETYIʼI MEJÔ 4 - Kalate Zambe Nnomo a Mfefe Mfefé Nkôñelan

Débora nkulu mejôa minga, ntyii mejô y'Israél

¹ Ane bone b'Israél be nga beta bo mam me n'abé e mise me Nti a koone na Ehud a wuya.

² Ane Nti a nga kuane be e mo me Yabin, njô bôte ya Kanaañ a mbe a jô'ô e Asor. Evete bita jé é mbe Sizera.

³ Ane bone b'Israél be nga yône be Nti, amu Yabin a nga bili bevagoñ bityé ya bita mintet ébu a valé a tibiliya bone b'Israél a njet ése tañe mimbu mewôm mebaé.

⁴ Melu mete Débôra, nkulu mejôa minga, nga Lapidôt, a mbe *ntyi'i mejô Israél.

⁵ A mbe a bo'o ésaé ya tyi'i mejô alene si be lo'one de na alene Débora e zañe Rama a Bétél, e minkôle y'Efrayim; a bone b'Israél be mbe be kele e be nye asu ntyi'ane mejô.

⁶ Nde nga loone Barak e mona Abinôam e Kédés-Néftali a jô nye na: Abendé Nti, Zambe y'Israél, nde di: Kele sulane bôt e nkôle Tabor, a nyoñe befam toyini awôme ya bone be Néftali a Zabuloñ.

⁷ Ma ye dutu Sizera, évete mewosane Yabin e be wo, ôtôñe Kison, a bevagoñe bé, a minsamba mié, a ma ye ve nye e mo môé.

⁸ Nde Barak a nga jô nye na: Nge bia wo bia ke wôna ma ye ke, ve nge bia wo bi nji ke, ma ye bo te ke;

⁹ nye na ma ye fo'o ke e nsamba wôé, ve wo ye bo teke duma e zene wo ke amu Nti a ye kuane Sizera e mo me minga. Nde Débôra a nga kôlô si a ke Kadés baa Barak.

¹⁰ Ane Barak a nga sulane Zabuloñ a Néftali e Kadés; nde befam toyini awôm be nga tôñe nye, Débôra fe a nga ke e nsamba wé.

¹¹ Ebér, mone Kénieñ a nga kandane Bekénieñ bevok ya bone be Obab, ntyia Môze, a a nga lame *nda éndelé jé a kui élône Saanayim, bebé e Kadés.

¹² Ane be nga kate Sizéra na Barak e mona Abinôam, a beteya e nkôle Tabor.

¹³ A, ataté Arosét-Goyim, Sizera a nga sulane bevagoñ bese, bevagoñ bityé mintet ébu a e bôte bese ba be nye be mbe, e mfa'a ya ôtôñe Kison.

¹⁴ Nde Débôra a nga jô Barak na: Kôlô'ô si, amu e môse Nti a ve Sizera e mo môé ñwô wu. Nti a wosan ôsu viôé. Ane Barak a nga so nkôle Tabor yôb a sis befame toyini awôm e mvuse jé.

¹⁵ Ane Nti a nga bôé Sizera asu Barak a bevagoñe bita bé bese, a minkane mié mise a meyo me nkpwaté mekôn. Ane Sizera a nga sis e vagoñ bita wé jé a tub a mebo.

¹⁶ Barak kik ve ke a tôñe a titane bevagoñ a nkane bita ôse a kui Arôset-Gôyim; ane nsamba mewosane Sizera ô nga mane wu ôse a meyo me nkpwaté mekôn fame jia teke li'i.

¹⁷ Ane Sizera a nga tub a mebo a ke e *nda éndelé Yaél, nga Eber, mone Kénieñ; amu *mvo'é é mbe e zañe Yabin, njô bôte ya Asor a e *nda bôte Eber, mone Kénieñ.

¹⁸ Nde Yaél a nga ke tôbane Sizera a jô nye na: Za'ak a *nti wom! Za'a *nda jam, te ko woñ. Nde a nga ke sobô be nye e *nda éndelé, ane a nga solé nye e mfinga si.

¹⁹ Nde Sizera a nga jô Yaél na ma wô'ô évé, ye ô ne nyuu me bone mendim? Eyoñe te a nga dii nde'e ba futi menyañ a ve nye mendime ya nyu a beta vute nye mfinga nyô.

²⁰ Eyoñe te a nga beta jô nye na: Tebe'e anyiine ya *nda éndelé; nge môt éziñ a zu sili wo na: Ye môt éziñ a ne va? wo ye yalane na: momo.

²¹ Ane Yaél, nga Eber, a nga nyoñ akône ya *nda éndelé, a nyoñe fe ôkuta'a a subu nye bebé ôte'etek a beme ny'akôn te éfase nlô jia ve tulan a ke bembe si, amu Sizera a mbe ôyo melom amu mbia atek a nga bili nye, nde a nga wu.

²² Barak a kele ôsu a tôñe Sizera, nde Yaél a nga kui atan a ke tôbane nye a jô nye na: Za'ak a ma ye liti wo e môte wo jeñ. Ane a nga nyiin e *nda jé a koone na Sizera a wuya akôn e beme nye éfase nlô jia.

²³ Ajô te Zambe a nga samele Yabin, njô bôte ya Kanaañ, asu bone b'Israél.

²⁴ Ane wo bone b'Israél ô nga dañe silane Yabine yôp, njô bôte ya Kanaañ, akekui be nga mane jiane Yabin, njô bôte ya Kanaañ.