BETYIʼI MEJÔ 3 - Kalate Zambe Nnomo a Mfefe Mfefé Nkôñelan

¹ Meyoñe Nti a nga ve awo'on a belane me asu ya ve'ele Israél, ba bese be nga bo teke yeme mewosan mese ya kanaañ,

² nalé a nga boban fo'o v'amu na miaé mi bôte y'Israél mi yem a yé'é bita, a dañe dañ ba be nji tame yeme bie ôsusua:

³ Meyoñ mete mme ma: bejô bôte betan ya Befilisteñ, Bekananééñ bese, Besidônieñ bese a Behévieñ bese be nga too e nkôle Libañ, ataté e nkôle Bal-Ermon a kui anyiine Amat.

⁴ Meyoñ mete me nga volô na Nti a ve'ele bone b'Israél, nalé Nti a ye yem nge ba ye bo mebendé me Nti mewôk, e ma a nga bendé b'ésaa anyu be Môze.

⁵ A Bone b'Israél be nga tabe ézezañe Bekananééñ Behétieñ, Beamorééñ, Beférézieñ, Behévieñ a Beyébuzieñ.

⁶ Be nga lu'u bengo bab a ve bobefame ya *meyoñ mete e bobebinga babe bebiene y'Israél, a be nga kañe bezambe bap.

Otniél, * ntyi'i mejô Israél été

⁷ Ane bone b'Israél be nga bo e mam me n'abé e mise me Nti, be nga vuane Nti, e Zambe wop, a kañe bebaal a beastarté.

⁸ Ane Nti a nga yaa Israél a kuane be e mo me Kusan-Riséatayim, njô bôte ya Mézôpôtamie. Nde bone b'Israél be nga saane Kusan-Riséatayim tañe mimbu muam.

⁹ Ane bone b'Israél be nga yôn e be Nti, a Nti a nga telé be *nkôté bôt a nga nyii be jôé na Otniél, e mona Kenaz, monyañe mongoo Kaléb.

¹⁰ Nsisime Zambe ô mbe be nye. A nga bo *ntyi'i mejô y'Israél a a nga ke bita. Nti a nga ve Kusan-Riséatayim, njô bôte ya Mésapotamie, e mo mé, a e wo wé ô mbe éwôlô e be Kusan-Riséatayim.

¹¹ Si é nga tabe *mvo'é tañe mimbu mewôm menyin. Ane Otniél, e mona Kenaz, a nga wu.

Ehud, * ntyi'i mejô y'Israél

¹² Ane bone b'Israél be nga beta bo *abé e mise me Nti; a Nti a nga ve Egloñ, njô bôte ya Môabe na a wosan Israél, amu a nga bo *abé e mise me Nti.

¹³ Nd'Egloñ a nga lat a Beamônite a Beamalésite a wulu dulu ya ke wosane Israél. Ane a nga bôm Israél a wôlé nye tisone melen.

¹⁴ Nde bone b'Israél be nga saane Egloñ, njô bôte ya Môab, tañe mimbu awôm a muam.

¹⁵ Ane bone b'Israél be nga yôn e be Nti a Nti a nga ve be *nkôté bôt, Ehud e mona Géra, e mvoñe bôte Bényamin, mbe émoñ (a). Bone b'Israél be nga lôme Egloñ, njô bôte ya Môab atôm a nye.

¹⁶ Ane Ehud a nga bo émiene nkpwaté mekôn ô bili meyo mebaé ô too nté anyi'i wo da, nde a nga tyelé wô e kandé, e mengômesane mé si, ô late a éfas éngele ya mbo nnôm.

¹⁷ Ane a nga kee Egloñ, njô bôte ya Môab atôm; v'Egloñ a mbe étua anene môt.

¹⁸ Eyoñ Ehud a maneya kalane nye atôm, nde a nga suu e bôt be nga zu liti nye be bulan.

¹⁹ Nde émien a nga beta so e vôme bengunemelane *mekok be nga too bebé a Gilgal a zu koone njô bôt a jô nye na: A njô bôt! me bili wo foé y'ôbé. Ane njô bôt a nga jô na: Evô! Nde ba bese be nga too nye bebé be nga mane kui atan.

²⁰ Ane Ehud a nga zu bebé be nye valé njô bôt a too si étune *nda jé ya yôb é mbe évôvoé a nje é mbe fo'o v'asu dé émien étam. Ehud a nga jô nye na: Me bili nkobô Zambe asu dôé: Nde Egloñ a nga kôlô éto jé a tebe tetele.

²¹ Ane a nga té nkpwaté mekôn e mbo nnôme wé, a beme nye wô abum.

²² Ane nyi'an akule wo ô nga nyiine fe abum a étyé nkpwaté mekôn ése, a avoñ e nga dib aveñ mbôma'an a étyé; amu a nji fe beta dutu nkpwaté mekôn abum; ve ô nga vam e mvus.

²³ Ane Ehud a nga kui atan e mfa'a ya falak éyoñe te a maneya dibe mimbé y'étune *nda a mengôñ.

²⁴ Eyoñ a kuiya atan, bebo bisaé be njô bôt be nga zu fombô a yene na mimbé y'étune ya yôb mi ne mfetan a mengôñ. Nde be nga jô na: Teke bisô na njô bôt a buti mebo mé évôvoé étune *nda jé ya yôp.

²⁵ Be nga yañge a ayap; a amu njô bôt a nji yoé mimbé y'étune *nda ya yôp, nde be nga nyoñ édiba'a a dii mie, a koé na e masa wop a bôô si, a wuya.

²⁶ Nté be mbe be yange'e a dimili éyoñ nje Ehud a nga tup; ane a nga lôte bengunemelane *mekok a tup a ke e Séyira.

²⁷ Eyoñ a nga kui, a nga loñ toñ e minkôle y'Efrayim. Nde bone b'Israél be nga sis e nkôle si ba be nye, a tele be ôsu.

²⁸ A nga jô be na: Tôñane ma, amu Nti a veya Bemôabite, besiñe benan, e mo menan. Nde be nga sis be tôñe nye mvus, nde be nga nyoñe mevôm mese ya Yordan me n'éyeyas e mfa'a ya Môab, teke li'i môte wuwua na a lôt.

²⁹ Nde *môs ôte, be nga wôé bôte ya Môab bebé toyini awôm, bese be too befam be ne biwôlô a ayok, teke môte wua a nga nyiñ.

³⁰ Ataté éyoñe te Bemôabite be nga ke éjôé Israél si. A si é nga tabe évôvoé tañe mimbu mewôme muam.

Samgar, * ntyi'i mejô y'Israél

³¹ E môt a nga tyendé Ehud a mbe Samgar e mona Anat. A nga wôé Befilisteñ mintete misaman a akoñ ba tindi de benyak, nye fe a nga nyii Israél.