BETYIʼI MEJÔ 20 - Kalate Zambe Nnomo a Mfefe Mfefé Nkôñelan

Bita, bebé ya mane wôé mvô'ô Bényamin

¹ Bone b'Israél bese, ataté Dañ a kui Birséba a sii Galad, be nga sulan ane môte wua asu be Nti e Mispa.

² Betebe ôsu bese a bôt ya *meyoñ mese y'Israél be nga sulan ékôane bôte be Zambe été e bôte ba wulu a mebo toyini mintete minyin, bedutu nkpwaté mekôn.

³ Bone be Bényamin be nga wô'ô na bone b'Israél be maneya ke e Mispa. Ane bone b'Israél be nga jô na: Koba'an, mbia jame nyô a nga kui aya'

⁴ Eyoñe te mone Lévite, nnôme minga be nga wôé a nga nyoñ nkobô a jô na: me nga suan e Gibéa ya Bényamin bia ébone jame na bia jô'ôbô meyôa.

⁵ Nde benya bôtô ya Gibéa be nga wô'ô ma *abé a bômane *nda me nga too a alu. Ma be nga kômbô wôé, ve ébone jam nje be nga jô'ôbô je a ngu.

⁶ Ane me nga bi ébone jam a ba je mefus a lôme me e si ése y'Israél; amu be nga bo jam e n'ôson a ôsame Israél été.

⁷ Bone b'Israél, mia bese mi ne vana ba, ajô te fasan a tyi'i jam mia yiane bo.

⁸ Ane bôte bese be nga kôlô si ane môte wua a jô na: Teke môte ya be bia a ye ke e *nda éndelé jé a teke môt a ye bulan e *nda jé.

⁹ E jam bia ye bo e Gibéa nde di: Bia ye ke wosane nye avale *asimba da ye liti.

¹⁰ Bia ye nyoñ, e *meyoñ mese y'Israél, bôt awôm e ntet ôse, bôte ntet e toyini ase a bôte toyini e toyini awôm ése; ba ye ke nyoñe bôte bidi; éyoñ ba ye bulan, bia ye bo Gibéa ya Bényamin aval ane ôsone jam a nga bo Israél été ô né.

¹¹ Nalé ate bôte bese y'Israél be nga sulane a tebe tisone Gibéa e ngame yat, be too nlatan tyiñe jia ane môte wua.

¹² Ane *meyoñ y'Israél me nga lôme bôt e mebum mese ya Bényamin be jô'ô na: Bidim bivé bi kuiya be bia bi'

¹³ Za'ane bezametane mam bese be ne e Gibéa, bi mane wôé be a findi *abé Israél été. Ve bone be Bényamin be nji kômbô wô'ô tyiñe bobenyañ, bone b'Israél.

¹⁴ Ane bone be Bényamin be nga mane so bitisone biab a sulan e Gibéa na be wosane bone b'Israél.

¹⁵ Elañe bôt be nga bo bone be Bényamin *môs ôte be so'o bitison, é nga liti bôte toyini mewôm mebaé a ésaman, bedutu nkpwaté mekôn, te lañe bôte ya Gibéa mbe be nga lañeban bôte ya mewosan tañe mintete zamgbwa.

¹⁶ E bôte bete bese été, bôte mintete zamgbwa be mbe émoñ; balé bese be mbe nguleya lume koñ ési te ke kop, éyoñ wo wua ôkôk a tolo.

¹⁷ Be nga lañe fe bôte y'Israél, ba ya Bényamin momo été: Bedutu nkpwaté mekôn toyini mintete minyin, bese be too bôte mewosan.

¹⁸ Nde bone b'Israél be nga kôlô si a ke Bétél a sili nkômbane Nti be jô'ô na: Za ya be bia a ye taté bet a wosane bone be Bényamin? Nti a nga yalane na: Yuda.

Dt. 13:13-19; Yas. 8:1-29

¹⁹ Eyoñe tyé é nga lendé, bone b'Israél be nga kôlô si a vule minkane miab ya wosane Gibéa.

²⁰ A bôte y'Israél be nga ke wosane Bényamin, be nga wosane be ôsu Gibéa.

²¹ Ane bone be Bényamin be nga kui atane Gibéa a wôé bôte y'israél *môs ôte bôte toyini mewôm mebaé a ébaé.

²² Nde bôte y'israél, be nga beta nyoñe ngu a beta ke wosan e vôm be nga tele e *môs ôsu.

²³ Ane bone b'Israél be nga bet a yôn asu be Nti a kui mamengô'é; be nga sili nkômbane Nti be jô'ô na: Ye bia yiane beta ke wosane bone be Bényamin be ne bobejañ? Nti a nga yalane na: Kela wosane be.

²⁴ Nde bone b'Israél be nga ke wosane bone be Bényamin e môse baa.

²⁵ E môse baa, bone be Bényamin, nkôlane ya Gibéa a ke tôbane be, e nseñ bita, be nga wôé bôte toyini awôm a muam ya bone b'Israél, bese be too bedutu nkpwaté mekôn.

²⁶ Ane bone b'Israél bese a bôte bese be nga bet a zu e Bétél: Be nga yôn a tabe valé asu Nti, be nga tyi bidi *môs ôte a kui mamengô'é, be nga tyi'i mimvean mi ne ngumba, a metuna'a ya nlatane ngbwa asu Nti.

²⁷ Bone b'Israél be nga beta sili nkômbane Nti, e ne éwolo élate Nti é mbe valé,

²⁸ a Finéas, e mona Eléazar, e mona Aron, nye a mbe a tebe'e ôsu éwolo Zambe melu mete, ane bone b'Israél be nga jô na: Ye ma yiane beta ke wosane bone be Bényamin, mojañ, ye me jô'é? Nde Nti a nga yalane na: Kelan, amu a akiti, ma ye ve be e mo menan.

²⁹ Eyoñe te Israél a nga sobô mbôma'ane a Gibéa.

³⁰ Ane bone b'Israél be nga ke wosane bone be Bényamin e môse lale a tôkan été bita ôsu e Gibéa aval ane biyoñ bivok.

³¹ Nde bone be Bényamin be nga zu tôbane bôte y'Israél; ane nkandan ô nga boban e zañe jab a tison. Be nga taté na ba wôé bôte y'Israél ane biyoñ bivok e minjoñe yôp, wua y'été wo bet e Bétél, wu ôvok e Gibéa éyoñ wo tyii afan afan; be nga wôé bôte y'Israél mewôm mela.

³² Bone be Bényamin be nga jô na: Be maneya wôéban ôsu viangan ane biyoñ bivok! Ve bone b'Israél be nga jô na: Ntubané a kandé be a tison e minjoñe mise!

³³ Nde bôte bese y'Israél be nga kôlô vôm be nga tele a ke e Bal-Tamar, wôna ba be mbe mesoé bebé a tison, be nga kôlô mesoé mab atemetem, e mfa'a nje'ese ya Géba.

³⁴ Nalé ate bôte toyini awôm, be nga tôban Israél ase été, be nga kui *zôsôô a Gibéa. Bita bi mbe angôndô, a bone be Bényamin be nga yeme na bidim bi kuiya be be.

³⁵ Ane Nti a nga ndumekane Bényamin fek ôsu Israél, amu *môs ôte bone b'Israél be nga wôé bôte ya Bényamin ba té nkpwaté mekôn bôte toyini mewôm mebaé a étan a ntete wua.

³⁶ Eyoñe te bone be Bényamin be nga yeme na be jañeya. Ve bone b'Israél be nga bo ane ba tek a li'i bone be Bényamine nseñ, be nga bo nalé amu be nga too ndi a bezimbi be nga too mbôma'ane a Gibéa.

³⁷ Nde bezimbi bete be nga zu avô bebé e Gibéa a sa nye, a wôé bôt y'été a meyo me nkpwaté mekôn.

³⁸ Be nga ve bôte bevo'o bese y'Israél ndem na ba ye bo na nsum ôtita ô bete yôb e tisone Gibéa.

³⁹ Eyoñe minsamba mewosane ya Israél mi nga bulane mvus ézezañe mewosan, bone be Bényamin be nga wôé be bôte bebé mewôm mela, nde be nga buni na be dañeya be aval ane éyoñ ya mvus.

⁴⁰ V'éyoñe te ébien, nsum ôtita ô mbe ndem, ô nga taté na wo bete yôb e Gibéa. Ane bone be Bényamin be nga fombô mvus a yen ôtita ô betek, e tisone jabe kik é ntoo nsum nduan été.

⁴¹ Nde bone b'Israél be nga kôñelan a wosane bone be Bényamin, ane be nga dañe ko woñ amu be nga yene na njuk ô kuiya be be.

⁴² Ane be nga tub asu bone b'Israél a ke mfa'a ya *nkôte si, ve minkane bita mi mbe abui, a mi mi nga solô mi nga futi nduan e tison mi nga late be ézezañ a mane wôé be mbia ñwôan.

⁴³ Ane bone b'Israél be nga bômane bôte ya Bényamin a tôñe be, a wôé be e zene *zen, te ke ve be mon awo'on, a kui e vôm éziñ a ne Gibéa mfa'a jôb da tôô.

⁴⁴ Ane bezimbi ya Bényamin be nga wu bôte toyini awôm a muam, bese be too miñyôyo'o mi bôt.

⁴⁵ Bôt bevo'o ya Bényamin be nga tub a ke e mfa'a ya *nkôte si, e mfa'a akôme Rimon. Bôte toyini étan y'été be nga wôéban e mezen, be nga tôñe ba bevok a kui Gidom, a beta wôé toyini ébaé.

⁴⁶ E bôte ya Bényamin be nga wu *môs ôte be mbe bezimbi toyini mewôm mebaé a étan, bese be too miñyôyo'o mi bôt.

⁴⁷ Ve da bôte mintete misaman ya ba be nga tub e mfa'a ya *nkôte si be nga bo nguleya fam awu; be nga kui akôme Rimon a tabe valé ngon ényin.

⁴⁸ Bone b'Israél be nga kôñelan a wosane bone be Bényamin be nga li'i; be nga lôt ataté tisone nyô a kui nyô fok, a wôé bôte bese a mimbam biyem, a futi nduan e minlam mise ya afôla si te.