BETYIʼI MEJÔ 18 - Kalate Zambe Nnomo a Mfefe Mfefé Nkôñelan

Bôt ya Dañ be nga wub biôm ya nkañan a mone Lévite ase

¹ Melu mete, njô bôt a nji bo Israél, melu mete fe ayoñe bone be Dañ e nga jeñe ngabe si ya tabe, amu a kui éyoñe te, ayoñe te e nji bi ngab e zañe *meyoñ y'Israél.

² Ane bone be Dañ be nga lôme adidi'i bôt atan be so'o ayoñe dab été, be so'o Soréa a Estaol, be ke looé si a fase je. Be nga jô bôte bete na: Kela fombane si Ane be nga kui e minkôle y'Efrayim a kui e ndaa Mika a bômbô valé.

³ Amu be nga bôô bebé e ndaa Mika, nde be nga wô'ô *tyiñ ésoé Lévite, ane be nga kôñelan a sili nye na: Za a nga soo wo va? Wo bo jé va? Jé é bili wo va'

⁴ A nga yalane be na: Mika a nga bo ma e jame di a di, a ya'ane ma, a me ntoo *ntuni wé.

⁵ Nde be nga jô nye na: Tame sili Zambe, bi yem, nge dulu bia te bôndé di da ye su'ulane nvo'é.

⁶ Ane Ntuni a nga yalane be na: Kelane nvo'é; Nti Emien a lita'ane mia e dulu mia zu wulu.

⁷ Ane bôte bete betan be nga ke a kui Layis. Nde be nga yene bôt be nga too été teke jam da tyelé be minleme yôb aval ane bôte ya Sidon, *mvo'é, njalan a ndi minlem; teke môt a ndeñele be nge tibili be a mbe si éte; be mbe ôyab a bôte ya Sidon teke lat a môt éziñ.

⁸ Nde bôt bete betan be nga bulan e be bobenyañe bab e Soréa a Estaol, ane bobenyañ be nga jô be na: Jé mi nga yene wé'

⁹ Be nga yalane na: E nkôla'ane si bi ke wosane be! amu bi maneya yene si, é ne étua abeñ. Jia! Mi too teke jô jam! Te boone minleles. Tata'ane dulu ya ke nyoñe si éte.

¹⁰ Eyoñ mia ye kui été mia ye koone bôt be too te tyelé minleme yôp. Si é ne ndam, a Zambe a veya je e mo mangan; jôm éziñe ya biôm bise bi ne e *si nyô é nji jemban été.

¹¹ Ane bôte mintete misaman ya mvô'ô Dañ be nga kôlô soréa a Estaol, be bili mengale bita map.

¹² Nde be nga bet a vule minkan e Kiryat-Yéarim Yuda; ajô te vôm ate, amu a ne e mvuse Kiryat-Yéarim, be nga yôlé nye a kui dene na Mahané-Dañ (k).

¹³ Akôlô ya valé be nga kui minkôle mi Efrayim, a kui e ndaa Mika.

¹⁴ Ane bôte betaan be nga ke looé si ya Layis be nga kobô a jô bobenyañe na: Ye mia yeme na e menda mana, éfôd, Térafim, *ngunemelan é ne nkpwelan a éve'ela é ne mboon a nyeman ékpwembé bi n'été? Fasane jam mia yiane bo.

¹⁵ Eyoñe te bôte bete betan be nga ke e ndaa Mika, be nga nyiin été a sili ésoé ndômane Lévite é mbe é too été avale é né.

¹⁶ Bôte mintete misamane ya bone be Dañ, be bili mengale bita map, be nga tele anyiine *mbé ya *nda.

¹⁷ E bôte betan be nga looé si éyoñ be nyiineya e *nda été, be nga nyoñe bengunemelane mevale meva, azezambe e ne nkpwelan a éve'ela é mbe mboon a nyeman ékpwembé. Ntuni a mbe a tele anyiine ya *nda ba be bôte mintete misaman be nga bili mengaa.

¹⁸ Eyoñ a nga yene bôte bevo'o be nyi'ine ndaa Mika a nyoñe bengunemelan a azezambe e ne nkpwelan, a nga sili be na: Jé mia bo le'

¹⁹ Be nga jô nye na: Tabe'e évô! Buti'i wo anyu dôé! Za'a bia be wo bi ke a bo *ntuni y'ayoñe dangan. Jé é ne wo mvaé: Ye bo *ntuni ya *nda bôt é bili môte wua, ye bo asu ayoñe da y'Israél'

²⁰ Ajô te *ntuni a nga dañe vak amu ngaka'a; ane a nga nyoñe bengunemelan, a azezambe e ne kpwelan a ke koone nsamba ôse.

²¹ Ane bone be Dañ be nga beta taté dulu; bongô, mimbam biyem a mimbe'e be tele be ôsu.

²² Eyoñ be ntoo ôyab a ndaa Mika, e bôt be nga too menda me mbe bebé a nyô Mika be nga loone bôte bevok a tôñe bone be Dañ.

²³ Be nga zu ba yôtan e mvuse bone be Dañ, nde be nga kôñelan a jô Mika na: Amu jé wo loone nalé? Jé é bo wo'

²⁴ Ane Mika a nga yalane na: Bezambe bam me nga kôm mi nyoñeya be a *ntuni a mi keya: Jé é li'iya ma? Amu jé mi ne nguleya sili me na: Jé é bo ma'

²⁵ Nde bone be Dañ be nga jô nye na: Te bo na tyiñe jôé é wô'é bebé vôm bi né; nge nalé momo wôna bôt ba dañe wô'ô ôlun ba ye té wo mintañete, éyoñ te wo ye soñ awu dôé womien a di bôte ya *nda jôé.

²⁶ Ane bone be Dañ be nga kee dulu dab ôsu. Eyoñe Mika a nga yene na bôte bete ba dañe nye ngu, a nga bulane *nda jé.

Ayoñe Dañ e Layis

²⁷ Nalé bone be Dañ be nga nyoñe biôme Mika a nga bo a kee *ntuni a nga bili. Ane be nga kui Layis, e be bôt be mbe ne mieññ teke jôm ja tyelé be nleme yôp; be nga wôé bôte bete a nkpwaté mekôn a di'i tisone nduan.

²⁸ Teke môt a nga kôté je, amu é mbe ôyab a Sidon a teke nlatan a môt éziñ; é mbe e mbi'ili wo ke kui e Bét-Rehôb. Ane bone be Dañ be nga beta lôñe tison a tabe été.

²⁹ Nde be nga yôlé tisone jôé na Dañ aval ane jôé Dañ, ésaa wob a nga bialé Israél e né; ve jôé tison éte e mbe ôsusua na Layis.

³⁰ Ane bone be Dañ be nga telé ôzezambe ô ne nkpwelan asu dap; a Yônatan, e mona Gerson, e mona Manasé, émien a bone bé, be nga bo ésaé betuni asu ayoñe bone be Dañ akekui éyoñe bôt be nga mane ke minkôm.

³¹ Be nga telé ôzezambe Mika a nga kôm asu dap, nté ôse *nda Zambe é mbe e Silô.