BETYIʼI MEJÔ 10 - Kalate Zambe Nnomo a Mfefe Mfefé Nkôñelan

Tôla a Yahir, betyi'i mejô y'Israél

¹ E mvus awu Abimélék ane Tôla e mona Pua, e mona Dôdô, môte ya Isakar, a nga tebe mfa'a ya nyii Israél; a nga too e Samir, e minkôle y'Efrayim.

² A nga tabe *ntyi'i mejô Israél tañe mimbu mewôm mela a mila; ane a nga wu a jambe e Samir.

³ Eyoñ a wuya, nje Yahir a nga tebe a too môte ya Galad; a nga tyi'i mejô Israél tañe mimbu mewôm mebaé a mibaé.

⁴ A nga bili bobefam mewôm melaa be mbe be betek e bone bijakase mewôm melale yôp, be bili fe bitisone mewôm mela, be nga loone fe bie na bitisone bi Yahir, bise bi too e si ya Galad.

⁵ Ane Yahir a nga wu a be nga jame nye soñ e Kamôn.

Yefté, * ntyi'i mejô y'Israél

⁶ Ane bone b'Israél be nga beta bo mam me n'abé e mise me Nti, be nga kañe Bebal a Beastarté, bezambe ya Siri, bezambe ya Sidon, bezambe ya Môab, bezambe ya Amon a bezambe Befilisteñ. Be nga li'i Nti teke saane nye.

⁷ Nde Nti a nga yaa Israél, a kuane nye e mo Befilisteñ a Beamônite.

⁸ Be nga ndeñele a kpwe'ele bone b'Israél mbu ôte, be nga bo fe bone b'Israél bese be mbe e Yordane yat, e sii Beamoreeñ ya Galad avale te.

⁹ Beamônite be nga dañe Yordan a ke wosane Yuda, Bényamin a ndaa Efrayim. Israél a nga nyiñ e beta ôlun été.

¹⁰ Nde be nga yône be Nti a jô na: bi boya wo *abé, amu bi li'iya Zambe wongan a kañe Bebal.

¹¹ Ane Nti a nga jô bone b'Israél na: Bôte y'Ejipte, Beamorééñ, Beamônite Befilisteñ,

¹² Besidônieñ, Amalék a Maôn be nga tibili mia, a éyoñ mi nga yône be ma, ye me nji nyii mia e mo map'

¹³ Ve mia mi li'iya ma a kañe bezambe befe. Ajô te maa ye ke beta nyii mia,

¹⁴ Kelan! A yônan e be bezambe mi tobeya, be nyii mia éyoñ y'ôlun!

¹⁵ Nde bone b'Israél be nga jô Nti na: bi boya *abé. Bo'o bia ane wo yene mvaé. Ve da na kañese'e nyii bia den!

¹⁶ Ane be nga vaa bezambe ya bikuu be mbe e zañe jab a saane Nti: Nde Nti a nga wô'ô ôlun amu mbia be mam be nga kui e be Israél.

¹⁷ Ane Beamônite be nga sulane vôme wua a vule minkan e Mispa.

¹⁸ Bôt, bivete ya Galad, be nga jô bana a bana na: Môte *mbé a ye taté ke wosane Beamônite? Nye a ye bo évete ya bôte bese ya Galad.