BESAM 99 - Kalate Zambe Nnomo a Mfefe Mfefé Nkôñelan

Nti ane Njôô bôt ane étyi

¹ Nti a ne njô bôt, *meyoñ ma fô'ôban. A bili éto éjôé jé e be Bekerubim yôp, si ja fô'ôsan.

² Nti a ne anen e Siôn, Yaa, a dañe *meyoñ me bôte mese nkôñ yôp.

³ Be kañe jôé dôé e ne anen a angôndô amu é ne mfufube jôé!

⁴ Ngul njôô é ne nye'ane metiñ, Wo ô nga telé mbamba nta'ane mam. Metiñ a *zôsôô Israél été, wo ô nga bo bie;

⁵ se'ane Nti e Zambe wongan, kutane meboñe si ôsu ételé mebo jé! A ne étyi!

⁶ Môze baa Aron, e betuni bé été, a Samuel ézezañe bôt be mbe be lo'one jôé dé, be mbe be sili'i mvolane wé nye ki a bo'o a yala'ane be.

⁷ Zambe a nga bo a kobô'ô be e nsum *nkut été, be nga ba'ale minkôman mi mame mié a metiñ a nga ve be.

⁸ A Tate Zambe wongan, womien ô nga bo ô yala'ane be, ô mbe Zambe a jibi mfa'a wop, ve ô nga ve be *melep ya mbia mimboone miap.

⁹ Wumula'an a yôtane mbetane yôb Nti wongan. lu'ane mesu si asu nkôle wé ô n'étyi. Yaa, Nti Zambe wongan a n'étyi.