BESAM 96 - Kalate Zambe Nnomo a Mfefe Mfefé Nkôñelan

Mféfé jia asu Nti a zu

¹ Yi'ane bia asu duma Nti yi'ane mfefé jia; mia bôte ya si ése nyô ése, yi'ane bia asu Nti.

² Yi'ane bia asu duma Nti, va'ane nye akéva amu a ne Zambe wongan. Môs ane *môs, kañeta'ane mbamba foé ya nyiane wé.

³ Koba'ane ajô ya duma dé e be bôte bese, e be *meyoñ mese; kañeta'ane bitua bi mam bié.

⁴ Nti a ne anen a da yiane na be kañe Nye. A ne angôndô a dañe bezambe bevok bese.

⁵ Bezambe ya *meyoñ be ne zesé biôm bese, ve Nti e nye a nga bo yôp.

⁶ Duma a étôtok bia faé ôsu wé; ngul a abeñ bi ne e *nda jé é n'étyi été.

⁷ Meyoñ me bôt ya mesi mese, za'a veane Nti duma, a yôtane étôtok jé a ngule jé.

⁸ Zaka yôtane duma dé, nyi'ane minseñ ya *nda jé é ne étyi a zu ve mimveane mienan.

⁹ Lumba'an a kui si asu Nti, éyoñ a liti étyi jé, fomba'an asu dé, mia bôte ya *si nyô ése.

¹⁰ Katane bôte bese na: Nti a ne njôô bôt, e nde fe si é yeme, a ja ye bo te fô'ôsan, a nye a tyi'i *meyoñ mejô a *zôsôô.

¹¹ Yôp e va'ak, a si é kamek, mañ me duñuk a biôm bise bi ne été!

¹² Mvuse nlam é va'ak a jem a bôte bese be too été! Bilé bise ya mefan, bi yôta'an a mevak

¹³ e mise be Nti, amu a ntele na a zu, a zu na a tyi'i *si nyô mejô. A ye bo *ntyi'i mejô a ne *zôsôô asu *si nyô. A ne *ntyi'i mejô a ne te bijô asu *meyoñ me bôt.