BESAM 92 - Kalate Zambe Nnomo a Mfefe Mfefé Nkôñelan

Aka'a mvaé ba bo na be kañe wo a Nti!

¹ Jia asu môse Sabat.

² E ne aka'a mvaé na be kañe wo, a Nti, a se'e wo a nyiane bia, A Zambe a dañe nkôñe yôp!

³ A kañete mvaé jôé ataté mametyé, a ndi nleme jôé a alu;

⁴ e mezik me mfañ a mvet a mbamba *tyiñ éngombé.

⁵ E jam ô nga bo, a Nti, e nga jalé ma a mevak, ma kute fas a jam ô nga bo.

⁶ A Nti, aka'a anen mimboone miôé mi né, asimesane dôé ki aka'a édok!

⁷ Okukut ô ne te yeme jame te, a nsusuk ô ne teke'e de wôk.

⁸ Nge mbia be bôte ba yaé ane mbia élok, nge bebo *abé bese ba nen, e ne amu njañan wo su'ulan wo yange be.

⁹ Ve wo, mfa'a ya yôb été, wo dôngane mam mese e ngu nnôm éto a nnôm éto, ô ne Nti.

¹⁰ Mfa'a besiñe bôé, a Nti, mfa'a besiñe bôé, ba ye jañ, a ba ba bo na bôte befe be tôbane njuk, bese ba ye tyamelan.

¹¹ O nga ve ma ngule nyat, a sôôé mon évôvoé mbone be ma.

¹² Me lôô ane besiñe bam ba ku si, a melo mam ma wô'ô mintat mi bôt ba tya'a ma mintañete.

¹³ Bezôsôô be bôt ba kui sam ane alen, ba yaé ane sédre ya Libañ

¹⁴ mbéan e *nda Nti, ba kui sam e minseñe mi Zambe wongan.

¹⁵ A be'e bibuma ja'ana a nga ke nnôm, a tabe njalan a meyemete a metyi m'ényiñ,

¹⁶ vevea ndem ya na Nti a ne *zôsôô, a teke'e bebadu'u, e nye a ne ako'o dam.