BESAM 91 - Kalate Zambe Nnomo a Mfefe Mfefé Nkôñelan

Vôm ya sobô e be Zambe a dañe ôyab e yôp

¹ Nyô a tebe asoé Zambe a dañe nkôñe yôp, nye a too ne njema e éjijine Zambe ya ngul ése été.

² Nyôlé a yiane jô Nti na: ô ne asoé dam a ôleme wom, ô ne Zambe wom, me too wo ndi.

³ Nti nye a ye kôté wo melam ba ke ba lame wo ôsu a ébubua ôkon ja wôé bôt (bim)

⁴ A ye kamane wo, wo ye yene vôme ya sobô be nye, aval ane mone kub e mefab me nyia wé si. Ndi nleme jé é ne nye ében a ékpwelé mewosan.

⁵ Wo ye bo te ko jôm éziñ woñ; to'o be angôndô be mam ya beta woñ ya alu, nge akoñ *élaé da yele a môs;

⁶ nge ébubua ôkon ja woñ dibi été, nge ayôñ ya jôb da jimbi bôt e zañe *môs.

⁷ Yaa, ja'ana bibubua bi mam bite, bia wôé bôt toyini bebé vôm ô né, a toyini awôm ki e mbo nnôme wôé, teke'e jôm éziñ ja ye bo wo.

⁸ Ku'i ve mis a wo ye yen ane Zambe a ya'ane bebo mam *abé.

⁹ Ya'a! Nti a ne wo vôm ya sobô, ô boya nyô a dañe nkôñe yôb ôlem.

¹⁰ Teke'e *abé éziñ da ye nambe wo, teke'e njuk éziñ wo ye subu wo bebé.

¹¹ Amu Nti a ye ve Béngele bé abendé na be ba'ale wo vôm ase wo ke.

¹² Ba ye be'e wo e mo mab yôp, na abo dôé e bo te bômôtô akok,

¹³ Wo ye wulu teke'e ko jôm éziñ woñ, a tibi ngbwengbwem nge akpwel yôp, wo ye tibi beta betit nge nyo yôb a mebo.

¹⁴ Amu a kabetane ma, nalé Nti a jô, ma ye telé nye vôm a sobô; ma ye kamane nye amu *a yem za nye me né.

¹⁵ Nge a loone ma me volô nye, ma ye yalane nye. ma ye tabe nye fefe, ôlune vié été, ma ye kôté nye, ma ye beta ve nye duma dé,

¹⁶ ma ye ve nye ényiñ é ne ayab a njalan, a ma ye bo na a yene na me ne *nkôté wé.