BESAM 90 - Kalate Zambe Nnomo a Mfefe Mfefé Nkôñelan

Ntabane nnôm éto Zambe a nlôtane môt

¹ A Nti, ô ne asoé dangan miaé mi bôte mise.

² Valé beta minkô be ngenan te bialé a ô ngenan teke té si a émo minlañ ése, aso nnôm éto a nnôm éto ô ne Zambe.

³ Wo bo môte na a bulan e mbulu'u été, amu ô nga jô na: a Mon Adam, bula'an été!

⁴ Yaa! e mise môé, toyini mimbu a ne ane môse y'angô'é, éyoñ ô lôteya, nge ki ane awolo da ya alu.

⁵ Wo vose mimbu mite ane biyeyem; bia lôte mametyé ane bilok.

⁶ Bilo'o bia faa mametyé, bi lôte fe; bia jo'olane mamengô'é, bi mane kôt.

⁷ Yaa, bi maneya a ayaa dôé, woñ ô biya bia amu ayo'o dôé.

⁸ Ô teléya bikobe biangan e mise môé a mam mangan me solô e vôm éfufube ya asu dôé é né.

⁹ Yaa, melu m'ényiñ mangan mese ma sibi amu ayaa dôé; a mimbu miangan mia lôt v'ane môt a suu abuk;

¹⁰ éyoñ éziñ ényiñe jangan ja tabe mimbu mewôme zamgbwa, nge é ne ke ngu, ja kui mimbu mewôme muam, a mvuñane wé ô ne ve zezé njuk; é ji'aya lôt, a bia ki bi maneya yele.

¹¹ Za a ne yem ngule ya ayaa dôé' Eyoñe môt a dañe ko wo woñ, éyoñe te a tu'a yem ayaa dôé!

¹² Ajô te, ye'ele'e bia bi lañe melu mangane tañ, nalé bia ye bi *nlem ô ne fek.

¹³ Bula'an zu, a Nti! Nalé a ye tabe nté *mbé' Koo bebo bisaé bôé éngôngo.

¹⁴ Ataté mametyé, jalé'é bia mebun a mvame jôé, nalé bia ye vak e melu mese y'ényiñe jangan.

¹⁵ Va'a bia mevak abim melu fe ô nga ve bia *melep, abim mimbu bi nga yene bidim.

¹⁶ Mboone wôé ô yené'é a mis asu bebo bisaé bôé, a étôto'o jôé asu bone bap!

¹⁷ Evôvoé Nti Zambe wongan é tabe'e be mia! Yemete'e ésaé ya mo mangan, yaa, ésaé ya mo mangan, yemete'e je.