BESAM 9 - Kalate Zambe Nnomo a Mfefe Mfefé Nkôñelan

Jia mvean akéva amu zôsôa Zambe

¹ Sam David asu évete beyia bia.

² Ma ye kañe Nti a nleme wom ôse, ma ye kañete bitôto'o bi mam biôé bise.

³ Ma ye va'a be wo, ma ye fôn. Ma ye yia bia asu duma ya jôé dôé a wo Zambe a n'ôyabe yôp.

⁴ Eyoñe besiñe bam ba bulane mvus ba kolé a wu ôsu viôé,

⁵ amu wo kamane mekabe mam a ajô dam, ô too éto njôane jôé ane zôsôa *ntyi'i mejô.

⁶ Wo yaa meyoñe bikuu, wo wôé ékotekote môt, wo tyame jôé dab nnôm éto a nnôm éto.

⁷ Te ke fe besiñ! nalé fe bilik! Bitison ô nga tyam, ôsimesane ya simesane bie ô jañeya.

⁸ Nti a too éto njôan nnôm éto; a nga telé éto njôane jé asu ntyi'ane mejô.

⁹ Nye a jôô émo *zôsôô, nye a tyi'i bôte mejô avale da yian.

¹⁰ Nti a bo'o ében asu nyô ba tibili, ében e biyoñe y'ôlun.

¹¹ Ba ba yeme jôé dôé ba tabe wo ndi, amu ô ne teke li'i ba ba jeñe wo, a Nti!

¹² Yi'ane bia asu duma Nti a too Sioñ, yôta'ane beta mimboone mié e *meyoñ me bôt été!

¹³ Amu a kune metyi me nga kui; a simesane me. A ne te vuane ñyône bingôngole bi bôt.

¹⁴ Mvama'ane ma, a Nti, yene bidime biam bia so be bôte ba vini ma, wo wo soo ma mimbé y'awu.

¹⁵ Nalé ate ma ye ba'alane tote bikaña'a biôé bise e mimbé mi ngone ya Sioñ; a na me fôn amu nyiane wôé.

¹⁶ Meyoñe bikuu ma fuban ébé be nga fak. Abo dab da bili avot be nga solé.

¹⁷ Nti a bo na be yeme nye, a tyi'i mejô; ékotekote môt é ne mbilan ôlam e mboone ya mo mé.

¹⁸ Bikotekote bi bôt bia ye kôñelan mfa'a éto miñwuan é né; meyoñe bikule mese ma vuane Zambe.

¹⁹ Amu be nji vuane *nzôzoé nnôm éto, ndi nleme bingôngole bi bôt é ne teke wu nnôm éto.

²⁰ Kôlô'ô si, a Nti! Môt a za dañé! Meyoñe bikuu ma yiane tyi'ibane mejô ôsu viôé!

²¹ Sô'é woñe be be, a Nti! Meyoñ me bôt me yeme na me ne fo'o ve bôt!