BESAM 89 - Kalate Zambe Nnomo a Mfefe Mfefé Nkôñelan

Elate Nti baa David nalé fe alun Israél

¹ Jia Etan, mon Ezrahite.

² Ma ye yia jia mimboone mi mame ya mvame Nti melu mese. Anyu dam da ye kañete fulu jôé ya tôé mam e miaé mi bôte mise.

³ Yaa! ma jô de na: Mvame jôé é ne nlôñane nnôm éto; *zôsôô wôé a ne ñyemetan e yôb été.

⁴ Me boya élat asu nyô me nga top, me nga kane mbo ésaé wom David ngana na:

⁵ Ma telé éto njôane jôé nnôm éto, me lôñeya wo éto éjôé asu miaé mi bôte mise.

⁶ A Nti, yôp e kañe étôto'o jame te! a *zôsôô wôé ékôane mimfufup été.

⁷ Za, e yôb été, a ne ane Nti' Za a funane Nti ézezañe bezambe'

⁸ Ekôane mimfufup été, Zambe a ne étua ékowoñ, angôndô a dañe ba bese ba bômane nye.

⁹ A Nti, Zambe ya mingungu! za a ne ngu ane wo, a Nti' Zôsôô wôé a ne wo mbôma'ane.

¹⁰ Wo wo jôô mebune ya mañ; éyoñe mintyôa mié mia bet, wo wo je'e mie.

¹¹ Wo ô nga ko'o mbime Rahab, a tyamelane besiñe bôé a ngule ya wo wôé.

¹² Yôp e ne éndôé! Si fe é ne énjôé! wo ô nga té émo minlañ a mefo'o y'été.

¹³ Akôé baa nké wo ô nga té bie; nkôle Tabor a nkôle Hermon ba kañe jôé dôé.

¹⁴ Wo ô nee wo ô ne njalan a éwôlô wu, e ngule wo nyô, e mbo nnôm ô ne mbetane yôbe wu!

¹⁵ Ntyi'ane mejô a metiñ bi ne mbôka'a ya éto njôane jôé; *zôsôô a benya mejôô mbie bi tele wo ôsu.

¹⁶ Mvom a ayoñe bôt da yeme kañe wo! Ayoñe te da ye wulu éfufube y'asu dôé, a Nti!

¹⁷ Amu jôé dôé, ba ye jeme *mebôk mimôse mise.

¹⁸ Yaa, wo ô ne ngule jab ja dañ; wo bete mvom asu jangan e yôp a mvame jôé,

¹⁹ ébene jangan é ne be Nti, a njô bôte wongan a ne be Mfufubu ya Israél.

²⁰ Môs éziñ, éyoñ ô nga yené, ô nga kobô *bebuni bôé ana: me nga ve mvolane wom e be nyô a n'éwôlô, me nga ve ésoé ndôman ya bôte bame duma.

²¹ Me nga yene David mbo ésaé wom, me nga wo'o nye mfufube mbone wom.

²² Akule wo dam e ne ngu da ye tabe fefele jé, a wo wom wo ye bo nye na a bo ngu.

²³ Nsiñ a ye bo te dilane nye atemetem, e môt a ben njôan a ye bo te nguleya samele nye,

²⁴ amu ma ye taté ôsu ma ke ma ko'o besiñe bé ma ye bibi ba ba vini nye.

²⁵ Zôsôô wom a mba'alan metiñ wom bia te tabe nye bebé, amu jôé dam a ye bete asu dé yôp.

²⁶ Ma ye futi mañ e wo wé si a beta be asôé e mbo nnôme wé si.

²⁷ A ye loone me na: Esaa wom! E Zambe wom! Akôm da nyii ma!

²⁸ A ma ma ye bo nye ntôle mon, Nyô a dañ nkôñe yôb ézezañe bejô bôte ya *si nyô.

²⁹ Ma ye liti mvame jam be nye nnôm éto, élate jam ja ye bo énjé teke selan.

³⁰ Ma ye bo na mvoñe bôte jé é tabee nnôm éto, a éto éjôé jé nté yôb da ye tabe.

³¹ Nge bone bé ba li'i metiñe mam, a bo te tôñe *zôsôô wom;

³² Nge ba tyam memvinda mam a bo te ba'ale mebendé mam,

³³ mbôl ba ngan ma ye lebe be a nkasa, a ma ye tyi'i nné ya minkobane miab a bibôm

³⁴ ve teke ve'ele bu'u mvame jam nge bo élate jame momo.

³⁵ Ma ye bo te tyam élate jam, ma ye bo te tyendé jam e kuiya ma anyu.

³⁶ Eyoñ jia ya biyoñ bise, me kaneya de ngana étyi jame yôp; teke bebé! Ma ye bo teke du'u David!

³⁷ Eto éjôé jé ja ye tabe nnôm éto; a éto jé ya jôô ja ye bo ane jôb asu dam,

³⁸ ane ngon é tele yôb été, aval ane ngaa a bo'olô ve bebela teke medu'an.

³⁹ Ve jam da na wo ô nga ben a bene Mesie wôé, wo ô nga wô'ô nye ôlun.

⁴⁰ Ô nga kat élat mia mbo ésaé wôé, a wua ékate duma jé si a ndaman étyi y'été.

⁴¹ Ô nga tyame meka'a mé mese a mane bôé bitison bi aleme bié;

⁴² e bôte bese ba lôtan be nga sa nye; tame yen ane bôte baa be be be too ba bo be *abé.

⁴³ Ô beteya ngule nsiñe yôp, ô boya bôte bese be ne nye ngame yate na be vak;

⁴⁴ ô kôñelaneya kôñelane meyo me nkpwaté mekône wé na me wosane nye, ô nji ke su'u nye awolo mewosan.

⁴⁵ Ô vaaya étôto'o jé a kpweé éto éjôé jé e si.

⁴⁶ Ô boya ényiñ ésoé jé étun, ô jaléya nye a ôson.

⁴⁷ A kui éyoñ évé, a Nti' Ye wo ye sobô éyoñ ése' Ye wo bele suu nduan y'ayaa dôé na é yôñ'

⁴⁸ Simesa'an nté ényiñe jam ja tabe; ô nga té môt, asu'ulane dé e ne jôm ébiasé!

⁴⁹ Môte *mbé a ne nyiñ te yen awu, a sa'ale éjôé ya étôtôlan'

⁵⁰ A Nti! abui mame me mvame jôé ya melu mvus e ntoo vé' Ô nga kane David ngana na ô ne te tyendé!

⁵¹ A Nti! Simesa'ane bebo bisaé bôé, be ju'uya wobane meta, ngum ayoñe wuna ñwô me be'e mbe'e ya été.

⁵² Besiñe bôé be taaya be, a Nti! ba ke ba tui menden e vôme Mesie wôé a wulu.

⁵³ Nti a bo'o ébotan nnôm éto! Amen a Amen!