BESAM 88 - Kalate Zambe Nnomo a Mfefe Mfefé Nkôñelan

Meye'elane ya nyii môt mfa'a ya awu

¹ Jia; Sam bone be Koré. Asu évete nsamba beyia bia fufulu a nloñane mfañ. Héman nye a nga tili.

² A Nti, Zambe wom a ne nyii bôtô! môse baa alu, me nga yône wo mis.

³ Meye'elane mam me tame kui be wo; ke'e alo mfa'a ya ñyône wom.

⁴ Amu ényiñe jam é jaéya a minjuk a me ntoo bebé ya wu.

⁵ Be nga lañe ma nsamba bôt be mbeme wu; me nyôna me ntoo môt a maneya,

⁶ éndômba ézezañe bewu, ane miñwuan mi bôô mesoñ, mmie mite ô nji fe beta simesan amu mi kandaneya wo.

⁷ Ô bôéya ma e bido'o ya ébé été, e dibi été, ato'o été.

⁸ Ayo'o dôé e tibiya ma yôp; ô yandaneya ma a mintyôa miôé mise.

⁹ Ô keya bemvôé bam ôyab a ma; ô boya ma jôm é ne angôndô e mise map. Me ne mfetan, teke zene ya kui atan.

¹⁰ Mise mam me te'eya a éngôngo. A Nti, me looneya wo mimôse mise! mo nsaman e be wo.

¹¹ Ye wo ye bo étua jam asu miñwuan' Ye bôt be wuya ba ye kôlô si a kañe wo'

¹² Ye ba kañete mvame jôé e soñe si, nge kañete *zôsôô wôé e vôme ya njañ'

¹³ Ye étua jame jôé ja ye bo na be yeme je e dibi été, nge nya ntyi'ane mejô wôé, e nlam ôvuan.

¹⁴ Ve ma ma yône wo mis, a Nti! Mametyé, meye'elane mam me ntoo asu dôé.

¹⁵ A Nti, amu jé wo wua me fé, wo solé ma asu dôé amu jé'

¹⁶ Engôngo, nte'an aso mongô, me tôbaneya beangôndô be mame bôé a me ntoo ane tit.

¹⁷ Ayo'o dôé e ko'otôya ma yôp a angôndô wôé a boya ma momo jôm.

¹⁸ Mimôse mise ayo'o te a angôndô ate bia bômane ma ane mendim, bi maneya bômane ma vôm ase.

¹⁹ Ô maneya kee e bôte bia be be bia wulu a bemvôé bam ôyab a ma; dibi e nde e ntoo bemvôé bam.