BESAM 86 - Kalate Zambe Nnomo a Mfefe Mfefé Nkôñelan

Sam meye'elan a ntabane Zambe mebun

¹ Meye'elane me David.

² A Nti, ke'e alo, yala'ane ma, amu me ne éngôngo a *nzôzoé. Ba'ale'e ma na me nyiñ, amu me ne *zôsôô. Wo, e Zambe wom, nyi'i mbo ésaé wôé a too wo ndi.

³ Ko ma éngôngo, a Nti, amu wo ma loone *môs ôse.

⁴ Va'a nleme mbo ésaé wôé avak amu nne me luu be wo, a Nti.

⁵ A Nti, wo ô ne mbamba *nlem, *nlem wo jamé, njalan a zôsôô mfa'a ya ba bese ba loone wo,

⁶ ke'e alo e meye'elane mam, a Nti! Vô'ôlô'ô tyiñe ñyône jam!

⁷ E *môs y'ôlun, ma loone wo, a wo yalane ma.

⁸ E bezambe été, teke wua a ne ane wo, a Nti! E jame wo bo e ne teke éve'an.

⁹ Meyoñ me bôte mese ô nga té, ma ye zu kute wo meboñe si a Nti, a kañe jôé dôé.

¹⁰ Amu ô ne anen, wo bo bitua bi mam, wo étam ô ne Zambe!

¹¹ A Nti, liti'i ma e zene jôé, a ma ye wulu ane bebela wôé a né. Kôme'e late nleme wome ne ta ô ko jôé dôé woñ.

¹² A Nti, wo ô ne Zambe wom, ma kômbô kañe wo a nleme wom ôse, a wumulu jôé dôé nnôm éto,

¹³ amu *zôsôô wôé a ne anen mfa'a wom, a ô kôtéya ma e bido'o bi vôm ya miñwuan.

¹⁴ A Zambe, e bôte be ne mebun be téya ma mintañete a ngume nsamba minjenjet wo jeñ ényiñe jam mbia njeñan, be nji lañe wo tañ.

¹⁵ Ve wo, a Nti, Zambe a ne nko éngôngo a *mvam, ôte'ete'e ya ji'a yaa, njalan a *zôsôô a mba'alane metiñ,

¹⁶ kôñela'ane be ma; ko ma éngôngo, va'a mbo ésaé wôé e ngule jôé a nyii mone mbo ésaé minga wôé.

¹⁷ Liti'i ndem é ne mvaé asu dam, éyoñe te besiñe bam ba ye woban ôson éyoñe ba ye yene na wo, Nti, wo kamane ma a volô ma *nlem.