BESAM 85 - Kalate Zambe Nnomo a Mfefe Mfefé Nkôñelan

Meye'elane ya ja'é mvame Zambe

¹ Asu évete beyia bia: Same bone be Koré.

² A Nti, ô litiya nye'ane wôé e be si jôé! Ô nga bo na minkôme mi Yakob mi so;

³ ô nga vaa ékobe bôte bôé, ô nga buti *abé dab ese.

⁴ Ô nga vaa ôlune viôé, a suu ngul ayaa jôé e si.

⁵ Bo'o na bi bulane telé mebo si, a Zambe nyii wongan! Jôké'é ôvitik ô bili mfa'a wongan.

⁶ Ye wo ye wô'ô bia ôlun nnôm éto, a wôñôlô ayaa dôé miaé mi bôte mise'

⁷ Ye sa wo wo ye beta zu bo na bi nyiñ, a bo ava'a ya bôte bôé'

⁸ A Nti, liti'i bia *zôsôô wôé, nalé fe va'a bia e nkôtane wôé.

⁹ Ma wô'ô jame Zambe Nti a jô; a jô na: *mvo'é asu bôte bé a *bebuni bé, ve da be bo'o te beta bo akute mboone dap!

¹⁰ Nyiane wé ô ne étua bebé be bôte ba ko nye woñ, a duma da ye tabe e si jangan.

¹¹ Zôsôô a Bebela be tôbaneya! Mvo'é baa Nya Ntyi'ane Mejô ki be wubaneya!

¹² Bebela a faa si a Nya Ntyi'ane mejô a so yôp.

¹³ Nti émien nye a ve mvaé a si jangan ja ve mvoñe jé.

¹⁴ Nya Ntyi'ane mejô a wulu nye ôsu, a medaa mebo mé ma liti *zen.