BESAM 77 - Kalate Zambe Nnomo a Mfefe Mfefé Nkôñelan

¹ Asu évete nsamba beyia bia; ane Yedutun a liti, Sam Asaf.

² Ma yône tyiñe yôbe be Zambe, tyiñe yôbe be Zambe, nye k'a vô'ôlô'ô ma.

³ Môse ma yene njuk ma ye jeñe Nti; wo wom ô nga too nsaman a alu ese, te jombô si; nleme wom ô nga bene volôban

⁴ Ma simesane Zambe a ma tat; ma fas, a nsisime wom ô ne nte'an.

⁵ Wo ba'ale biyakolô biam na bi bo te buteban; *nlem ô tyele ma yôp: Me nji kobô.

⁶ Ma simesan mam ya melu kôa, mam ya mimbu ayabe mvus;

⁷ ma simesane jia jam a alu, ma bindi mam e *nlem wom été a nsisime wom wo ke wo fas.

⁸ Ye Nti a ne nguleya wua me fé nnôm éto' Ye a ye bo te fe beta mvamane môt'

⁹ Ye mvame jé é maneya' Ye jam a jô e boya momo nnôm éto'

¹⁰ Ye Zambe a vuaneya liti bia *mvam' Ye ôlune vié été a wuaya nkoon éngôngole wé e fé'

¹¹ Ma jô na: mintaé miam mi ne na: mbo nnôme ya nyô a dañe nkôñe yôp ô nji beta bo avale da.

¹² Ma ye simesane mimboon mi Nti jôé, amu ma dañe simesan bitua bi mam biôé ya melu kôa.

¹³ Ma ye bindi mimboone miôé mise. Ma ye kañete ajô ya biwôlô mimboone biôé.

¹⁴ A Zambe! Zene jôé é n'étyi été, *zambe mbé a n'anen ane Zambe'

¹⁵ Wo ô ne Zambe a bo bitua bi mam; ô nga liti ngule jôé e *meyoñ me bôt été.

¹⁶ Ô nga kôté ayoñe bôte dôé a wo wôé: bone be Yakob baa Yôsep.

¹⁷ Mendim me nga yene wo, a Zambe, mendim me nga yene wo, me nga fô'ôban; yaa! beyee be nga fô'ôsan.

¹⁸ Minkut mi nga sôôé atôñe mendim e si, nkulu a nga bam e yôb été, yaa, mekoñe bilaé môé me nga yele mimfa'a mise.

¹⁹ Feleves é nga ve émo minlañ éfufup éyoñ éduñe zo'oyañe jôé é nga wô'é ôlendé été; si é nga fô'ôsan a fô'ôban.

²⁰ Zene jôé é mbe e mañ été, ôsozene wôé ô mbe e beta mendim été a môt a nji fe beta yem awoé dôé.

²¹ O nga liti ayoñe bôte dôé *zen ane mbame biyem, ô bela'an wo Môze baa Aron.