BESAM 76 - Kalate Zambe Nnomo a Mfefe Mfefé Nkôñelan

Zambe a tyameya bita e Sioñ

¹ Asu évete nsamba beyia bia. Bibômébômé bi bili minkol. Sam Asaf. Jia.

² Ba yeme Zambe e Yuda, jôé dé e n'anen Israél été.

³ Nda éndelé jé é ne e Salem, a étaba'a jé e Sioñ.

⁴ E nne a nga bu'u mekoñ bilaé valé, nalé fe ében, nkpwaté mekôn ya bita.

⁵ Wo faé abui a abeñ a dañe, minkôle mi too nnôm éto.

⁶ Mimben a miñyôyo'o mi bôte mite be nga mane sa be biôme biap, ane be nga ke ôyo y'awu; be nga bo teke yeme kamane bebien.

⁷ A Zambe Yakob, ayaa dôé été, vagoñ a ékabela be nji fe fô'ôsan

⁸ Wo ô ne nyô ya ko woñ! Za a ne tebe wo e mis éyoñe wo yaa'

⁹ O mane tyi'i ajô ô too yôb été, e si kik bôte be bili'i woñ a tabe ne mieññ;

¹⁰ éyoñe Zambe a kôlô si na a tyi'i mejô, mfa'a ya zu nyii ba bese ba woban ôson e *si nyô.

¹¹ Ayo'o ya bôt ebien da kañe wo; ô ne mbôman a *mebuka'a y'ayaa.

¹² Tiñeta'an Nti, e Zambe wônane mam, a bo'one me! Ba bese ba bômane nye be za'a mimvean e be Zambe a n'angôndô!

¹³ A tyi'i mvebe e be bivet; a n'ékowoñ e be bejô bôte ya *si nyô.