BESAM 74 - Kalate Zambe Nnomo a Mfefe Mfefé Nkôñelan

Minyôn amu * nda Zambe é maneya tyamban

Jia Asaf.

¹ A Zambe, amu jé wo wua bia fé nnôm éto' Amu jé ayaa dôé da yôñ e nyôle mintômba ya mbam biyem wôé'

² Simesa'an ayoñe bôte dôé, e di ô nga nyoñe melu kôa; e di ô nga kôté na é bo nsamba bôte ya ngabe jôé; simesa'ane Nkôle Sioñ, vôm ô nga too.

³ Kele wo bet a mebo môé mfa'a be nga mane tyam, amu nsiñe wôé a maneya ndamane jôm ése é ne vôme wôé a n'étyi.

⁴ Besiñe bôé be maneya bam e vôme wôé a n'étyi été mendeme map be maneya telé me ane minlinga miap.

⁵ Ba funan ane bôt ba bete avône yôp, a ba'é bilé e fut afan.

⁶ A éyoñe ji, minkpwelane mi biôme mise, ba bôé mie a ôvôn, a akuta'a.

⁷ Be bo'éya *nda jô'é é n'étyi nduan; be biaséya étaba'a ya jôé dôé a wua je e si.

⁸ Be nga jô e minleme miab été na: Bia tame zu bo be éndaman, a mane di'i mevôm mese me n'étyi bisulan bia boban e si éte.

⁹ Bi nji yene mendeme mangan; *nkulu mejô éziñ a nji fe bo; a teke môt éziñe ya be bia a yem nté jame te da ye tabe.

¹⁰ Nté avé besiñe ba ye bo étibela'a, ya kpwe'ele, a Zambe! ye besiñ ba ye bo éyoñ ése ve kobô jôé dôé ébiasé'

¹¹ Amu jé wo dutu wo ya mbo nnôme wôé mvus' Va'a wô e tôé jôé a mane jiane be.

¹² Ve Zambe a ne njô bôte wome nnôm éto, a bo'o *nkôté ézezañe ya *si nyô.

¹³ O nga kandé mañ a ngule jôé; ô nga tya'a minlô bibibi e mendim me mañ été.

¹⁴ Ô nga bôé minlô mi Léviatañ a ve nye ane bidi e be ngum ayoñe bôt, e be bôte be too *nkôte si.

¹⁵ Wo ô nga bo na menjeñ a atôñe mendim bi vame si. Wo ô nga vele asôé e ne te vele.

¹⁶ Môs baa alu bi n'émbiôé wo ô nga telé ngon a jôp.

¹⁷ Wo ô nga telé minné mise ya si wo ô nga bo ésep a ôyôn.

¹⁸ Simesa'ane jame dina na: môt a ne nsiñ a samele Nti; ayoñe bôt e ne *te fek da kpwe'ele jôé dôé.

¹⁹ Te kuane ényiñe zume jôé e be betite ya fé; te vuan ényiñe bingôngole bi bôte biôé nnôm éto.

²⁰ Simesa'an élate jôé; amu mevôm me ne dibi e si nyô me ntoo njalan a mesoé me bôte ba bo ézezam a évô.

²¹ Môte ba tibili a bo'o te bulan ôsone nyô! Engôngole môt a *nzôzoé be tame kañe jôé dôé!

²² Kôlô'ô si, a Zambe, a kamane ajô dôé! Simesa'an ôsame môt a ne te fek a kuli wo *môs ôse!

²³ Te vuane tyiñe besiñe bôé, nalé fe éngôngôme ja nnene éyoñ ése é so'o be bôte ba wosane wo.