BESAM 73 - Kalate Zambe Nnomo a Mfefe Mfefé Nkôñelan

Asu'ulane bikotekote bi bôt a di bezôsôô

¹ Sam Asaf. Yaa Zambe a ne mbamba môt mfa'a Israél mfa'a ba be bili minlem *mfuban!

² Ve mfa'a wom, mebo mam me nga li'i tyôtyoé ya bili atek, medaa mebo mam me nga ye sendé.

³ Amu me nga suñe mekute me bôt aban amu me nga yene bikotekote bi bôt, mame map me kel'ôsu.

⁴ Jôm éziñ é nji ndeñele be nsisim a kui *môs awu dap, a menyôle map me n'anen abui;

⁵ Be nji bi ngap e minju'u bôte ba tôbane mie. Be nji bi minjuk ane bôte bevok.

⁶ Ajô te ba jaé mebune map ane nsanga a ba jaé évô ane ngômesan;

⁷ mesu mab me n'anen amu me ne njalan a avoñ, asimesane ya minleme miap da lôte nné.

⁸ Ba woé vioé ékpwe'ele a kobô *nkpwala ajô ya tibili bôt; ba kobô *minkobô mebun a *tyiñ yôp.

⁹ Ba bete menyu map a kui yôb été. A ôyeme wob wo ke wo wulu *si nyô été.

¹⁰ Ajô te nde ayoñe bôte dé da kôñelane mfa'a wop a nyu *minkobô miab ane mendim.

¹¹ A da jôbane na: Zambe a ne yeme jame da boban aya, nyô a ne yôb été a ne yem aya'

¹² Nalé nye bikotekote bi bôt bi né: be too te jôm ja ndeñele be a akume dabe ve yaé.

¹³ Nde me nga tune ñhe nleme wom e zesé, a sôbe mo mam e me me ne te bijô.

¹⁴ Môse mise ma tôbane minjuk, tyé ése, ma tôbane melebe mam.

¹⁵ Nge me too ye jô na: Me tame zu kobô ane be, ô lôô me nga ye kuane ayoñe bone dôé.

¹⁶ Ajô te me nga fas asu ya na me wô'ô jame te ane é né; v'é mbe ayaé e mise mam,

¹⁷ akekui me kuiya mevôm me Zambe me n'étyi: éyoñe te me nga yem asu'ulane bikotekote bi bôt

¹⁸ yaa, wo telé be e mezen me n'asen. Wo sô'ôlô be éndeñela'a été.

¹⁹ Eté été, be boya ki ve momo, be maneya man amu angônda woñ a bili be!

²⁰ Ane biyeyem éyoñ môt a vee ôyo, nalé wo tyam éyeka'a jap, a Nti!

²¹ Eyoñe nleme wom ô mbe ô wô'ô ôlun a wô'ôtan ane mintaé mia ke kui ma e zoñe *nlem,

²² me mbe nsusuk, teke ñyeman, me too ane tit asu dôé.

²³ Ve da bia wo bi ne nsamba éyoñ ése, ô biya ma mbo nnôm;

²⁴ Wo wulu ma a fe'e jôé, mvuse valé wo ye nyoñe ma étôto'o été.

²⁵ Za mfe me bili e yôb été' Nge ô vaa womien, teke mvaé éziñ ma yen e *si nyô.

²⁶ Minsône miam a nleme wom bi ne bo momo: Zambe ny? a ye bo ako'o ya nleme wom a ngabe jam nnôm éto.

²⁷ Amu tame yene na e bôte ba ke wo ôyab ba mane wu, wo tooé ba bese be nji buni wo évô.

²⁸ Mfa'a wom, mvaé jam é ne na me subu wo bebé: me futiya asoé dam e be Nti nyô a ne Zambe, nalé ma ye kañete ajô ya mimboone miôé mise.