BESAM 72 - Kalate Zambe Nnomo a Mfefe Mfefé Nkôñelan

Zambe a bota'ane njô bôt

¹ Sam Solômon. Va'a njô bôte zôsôa ntyi'ane mejô, a Zambe, nalé fe *zôsôô wôé e be mona njô bôt.

² A ye tyi'i bôte bôé mejô zôsôô a bingôngole biôé aval ane da yian e metiñ.

³ Beta minkôl ba ye soo ayoñe bôte mefok, bone minkôle ki zôsôa ntyi'ane mejô;

⁴ A ye tyi'i ayôme bôte y'ayoñe dôé mejô, a ye nyii bingôngole bi bôt a fit ba ba tibili be!

⁵ Ba ye ko wo woñ nté jôp da ye faé nalé fe nté ngon ja ye faé aso miaé bôte wu akekui miaé bôt ôvok.

⁶ A ye sis aval ane mveñ ja noñe si é ne ntyéan, aval ane mendim ma ve si émumun.

⁷ Zôsôa môt a ye bu'uban éyoñe melu jé, a *mvo'é ja ye bo abui akekui ane jôbe da dim.

⁸ A ye dañ a so mañe ma a kui ma mevok, ataté ôsôé vi a kui meku'u ya si.

⁹ Bôte be too *nkôte si ba ye kute meboñe si e mise mé, a besiñe bé ba ye nyiane mbuluk.

¹⁰ Bejô bôte ya Tarsis a ba ya bikôte bi mañ ba ye soo mimvean, bejô bôte ya Saba a Seba ba ye ve memvaka.

¹¹ Bejô bôte bese ba ye kute meboñe si e mise mé meyoñe bijôé mese ma ye saane nye.

¹² Amu a ye kôté ôyôme môt wo yôn a éngôngole môt é ne teke mvolan

¹³ a ye ko ntetek a *nzôzoé môt éngôngol a ye nyii ényiñe minzôzoé;

¹⁴ a ye beta kôté ényiñe jap mfa'a ya mvô a évô, a metyi map ma ye bo beta tañ e mise mé.

¹⁵ Enyiñ ja ye bo a ba ye ve nye mvote ya Saba; ba ye ye'elan ajô dé éyoñ ése, ba ye botane nye *môs ôse.

¹⁶ Si ja ye bi abui bidi. Afo'o dé da ye yené abôbône beta minkô aval ane nkôle Libañ. Bôt ba ye bo abui e bitison ane bilo'o ya si.

¹⁷ Jôé dé da ye tabe nnôm éto, jôé dé da ye wô'ôtan ayabe fe, nté ôse jôbe e tele. Bôt ba ye veane bibotane zañe jap e jôé dé; meyoñe me bôte mese ma ye jô nye na a n'ébotan.

¹⁸ Ebotan é bo'o be Nti nyô a ne Zambe, e Zambe Israél, e nye étam a bo bitua bi mam!

¹⁹ Jôé dé e n'étôtok é bo'o ébotane nnôm éto, si ése é jaé ne lut a étôto'o jé! Amén! Amén!

²⁰ Amané ya meye'elane me David e mon Izayi.