BESAM 71 - Kalate Zambe Nnomo a Mfefe Mfefé Nkôñelan

Te li'i ma éyoñe me ntoo nnôme ji

¹ A Nti ma sobô be wo, te kañese na me veban ôsone nyô!

² E *zôsôô wôé été, kôté'é a nyii ma; tame kee alo dôé be ma a nyii ma.

³ Bo'ok ako'o ma sobô été a éwôlô ôlem ja nyii ma amu ô n'ako'o dam a ôleme viam.

⁴ Kôté'é ma, a Zambe wom a vaa ma e mo me mbia môt, mfa'a môt a n'ékotekot a njet.

⁵ Amu ô ne ndi nleme jam, a Nti, éto ngunguane jam aso mongô, a Nti!

⁶ Me ye'e be wo aso abialé dam: wo ô nga vaa ma me so'o abume nane: ékaña'a jam é ne be wo éyoñ ése.

⁷ Me ntoo an? ébubua môt e be bôt abui; ve wo ô n'ôleme viam.

⁸ Anyu dam da ye jaé ne lut a ékaña'a jôé, nalé fe duma dôé *môs ôse.

⁹ Te wua ma fé éyoñe me ntoo nnôm; te li'i ma éyoñe ngule jam ja man,

¹⁰ amu besiñe bam ba ke ba tote ma; ba ba bole nsisime wom, ba bôndé mefe'e fufulu,

¹¹ a jô na: Zambe a li'iya nye, tita'ane nye a biane nye; amu môte ya nyii nye a ne momo.

¹² A Zambe te tabe m'ôyap; a Zambe wom bo'o avôle ya volô ma.

¹³ Kañese'e na be veban ôsone nyô a jañ, ba ba siñe nsisime wom; jalé'é be ékpwe'ele a ôson, ba ba jeñe zene ya bo m'abé.

¹⁴ Ve ma ye tabe ndi nleme kom ése a ma ye dañe bulu kañe wo.

¹⁵ Anyu dam da ye kañete bezôsôô mimboone bôé, da ye kañete mimboone ya nyiane wôé *môs ôse, amu tañe jab ja dañ abim ma yem.

¹⁶ Ma ye kañete biwôlô mimboon bi Nti Zambe. Ma ye wumulu *zôsôô wôé v'éñwôé étam.

¹⁷ A Zambe, ô ye'eleya ma aso mongô; a zu kui éyoñe ji, me nga kañete bitua bi mame biôé.

¹⁸ Yaa, ja'an éyoñe me ntoo nnôm a nyube nlô, a Zambe, te li'i ma, akekui ma ye mane kañete foé ya ngule jôé e be miaé mi bôte mise mia zu.

¹⁹ A Zambe, ngule jôé a *zôsôô wôé bia kui ôyabe yôb été; wo ô ne nyô a nga bo beta be mam. Za a ne aval ane wo, a Zambe'

²⁰ Wo ô nga liti ma abui mbia minjuk, wo ye beta ve ma ngule *nlem, a wo ye beta nyoñe ma me so'o e bido'o ya *si nyô.

²¹ Wo ye nene duma dam a beta volô ma *nlem.

²² Ma ye fe kañe wo a mvet, amu fulu jôé ya yeme tôé mam môé, a Zambe wom; ma ye yia wo bia y'ékaña'a a éngombé, a wo Mfufubu ya Israél.

²³ Biyaé biam bia ye tôtan a mevak, éyoñe ma yia wo bia y'ékaña'a, nalé fe nsisime wom ô nga kôté.

²⁴ Oyeme viame fe via ye kobô ajô zôsôa mvolane wôé ngume nté *môs. Amu be maneya veban ôsone nyô a bo fe'e ne vema, ba ba jeñe zene ya bo ma *abé.