BESAM 7 - Kalate Zambe Nnomo a Mfefe Mfefé Nkôñelan

Womien tyi'i ajô dam

¹ Jia David a nga yia Nti ajô Kus e mone Bényamin.

² A Nti, e Zambe wom! e be wo nye ma jeñ asoé dam; nyi'i ma be bekpwe'ele bam bese a kôté'é ma,

³ a za nyabe ma ane ngbwengbwem ja kee jôm a te bi te môt a kôté je.

⁴ A Nti, e Zambe wom! nge me boya jame te, nge mvô é ne e mo mam été,

⁵ nge me bulaneya *abé e be nyô a mbe a nyiñe ma *mvo'é, nge me foneya nsiñe wom te k'étom,

⁶ nsiñe wom a ntoo ve tôñe ma a nambe nsisime wom, a wo'otô'ô ényiñe jame si, a bôôé duma dam e mbulu'u été!

⁷ Ayaa dôé été, kôlô'ô si a Nti, kôlô'ô si a wosan ayo'o ya besiñe bam. Ve'e ôyo asu dam, e wo ô nga telé metiñ!

⁸ Ekôane bôt é bôma'ane wo! bula'an ô too je nya ôyabe yôp!

⁹ Nti a tyi'i bôte mejô: a Nti, tyi'i ma ajô aval ane *zôsôô wom a né, a aval ane me ne *mfuban teke bijô!

¹⁰ Telé'é *abé bikotekote bi bôt bia bo a yemete zôsôa môt, a wo wo yemelane minlem a mebun me bôt, e Zambe a ne *zôsôô!

¹¹ Ebene jam é ne fefele Zambe, nyô a nyii ba be ne minleme *zôsôô.

¹² Zambe a ne zôsôa *ntyi'i mejô, e Zambe a ne nguleya wô'ôlun *môs ôse.

¹³ Nge a bo te bulane be nye, ékotekote môt ja jebe nkpwaté mekône wé, a kolé *élaé jé a sôñe je nkôman.

¹⁴ V'a kômesan mengale ma wôé asu dé a mekoñ ma di'an asu dé fe.

¹⁵ A saé asu ékotekote mboon. A nyoñ abume mam *abé a biaé ékotekot.

¹⁶ A yooé ébé, a fa'a je a a ku ébé émien a nga fak.

¹⁷ Abé dé da ku e nlô wé yôp. A évô jé ja beta sise nye mvom asu.

¹⁸ Ma ye kañe Nti amu *zôsôô wé, ma ye yia bia asu duma ya jôé Nti, nyô a n'ôyabe yôp.