BESAM 68 - Kalate Zambe Nnomo a Mfefe Mfefé Nkôñelan

Jia ya nyoñe Zambe nyô a dañ

¹ Asu évete nsamba beyia bia; Sam David jia;

² Zambe a kôlô'ô si, besiñ bé ki be tyamela'an; e ba fe be tele nye ngame yat, be mate'e a tub asu dé.

³ Aval ôtita via mialan a mane jañ, nal'ate tyamela'ane be; aval éko ja nyemé e mfôme nduan, nal'ate bikotekot bi bôt bia jañ e mise me Zambe.

⁴ Ve bezôsôô be bôt be va'ak; be tame tyele si asu Zambe, be tame kute fas a mevak!

⁵ Yi'ane Zambe bia, yi'ane jôé dé bia bi ékaña'a; fa'ane njoñ asu nyô a ke a wulu fé été; jôé dé e ne na Nti; mi kutane fas e mise mé.

⁶ Esaa bobenyui a mba'ale minkus, a ne Zambe a too e mfufub'étaba'a wé été.

⁷ Zambe a tooé môt a n'étam e menda me bôt été; a suu mimbôk a ve mie éto fili ya mevak; ve bôte metyama'ane ba tabe si é ne teke jôm.

⁸ A Zambe, éyoñ ô mbe ô wulu'u bôte bôé ôsu, éyoñ ô nga tulane *nkôte si,

⁹ si é nga fô'ôsan, yôbe fe e nga nyemé asu Zambe; Sinayi a nga fô'ôsan e mise me Zambe, e Zambe Israél.

¹⁰ Wo a Zambe, ô nga lôm abui mveñ, ô nga ve ngabe jôé ngu ate'e dé été.

¹¹ E nne bôte bôé be nga tabe valé, wo, wo Zambe a ne mbamba *nlem, ô nga kômôtô bingôngole bi bôt.

¹² Nti a kobôya, e binga ba soo mbamba mefoé be boya beta abui nsamba bôt.

¹³ Bejô bôte ya minsamba mewosane besiñ ba tube mbi, binga ba li'i *nda be nga kabane biôme ya nsa.

¹⁴ Nté mi mi bôô si e nka'alé biyem été, mefabe me zum ki ma yañeban nyôle moné, a mesaé mé ma jaé nyôle mvot.

¹⁵ Eyoñe Zambe a ne ngul ése a nga mialane bejô bôt, bibañe mendim bi nga ku e nkôle Salmôn.

¹⁶ Nkôle Basañ ô ne nkôl ô n'étyi; nkôle Basañ ô bili abui mebôbôn.

¹⁷ V'amu jé nkôl ô bili abui mebôbôn ô n'éviele e be nkôle Zambe a nga tobe na a tabe été, e vôme Nti a too nnôm éto'

¹⁸ Zambe a bili bevagoñ bita betoyini mewôm betoyini. Nti a ne ézezañe jap, e nkôle Sinayi a zu vôm a n'étyi

¹⁹ ô beteya e *vôm a ne ôyabe yôp, ô maneya bi bôt a kee be minkôm. ô maneya nyoñe mimveane be bôt, to'o be bôte ba kange njôane wôé, ane wo ye bi étaba'a été, a Nti Zambe!

²⁰ Nti a yian akéva *môs ane *môs. Zambe nyô a ne nyii wongan a be'e mbe'e wongan.

²¹ Zambe ate, mfa'a wongan, nye a ne Zambe ya nyian; Zambe Nti, e nye a ne bo na awu e bo te bi bia.

²² Ve bebela a ne na, Zambe a ye tya'a besiñ bé ékôkoé nlô, a bôé fe abôbône nlô ya bôte ba nyiñ e mam *abé été.

²³ Nti a nga jô na: ma ye beta bulane be be be so'o Basañ; ma ye zuu be be so'o bido'o bi mañ;

²⁴ nalé wo ye dube mebo môé e metyi été, nalé ayeme bemvu bôé da ye bi ngabe jap e be besiñe bôé.

²⁵ Melu ya minsamba miôé me maneya yené, a Zambe, mulu minsamba mi Zambe wom, njôô wom, éyoñ a nga bo'o a kelek e mfufube vôme wé!

²⁶ Beyia bia be kel'ôsu, bebôme biôm be tôñe mvus; ézezañe jap, bengone be binga be bôme mengom:

²⁷ Mi kañane Zambe e bikôan été, kañane Nti, mia mi ne ba y'anjeñ Israél!

²⁸ Vôm ate Bényamin a ne mon a su'ulan e nye a jôô be; bone bejô bôte ya Yuda nsamba wop, bone bejô bôte ya Zabuloñ a ba ya Néftali.

²⁹ Zambe wôé a nga tyi'i na wo ye bo ngu. Liti'i ngule jôé, a Zambe; mfa'a ya tu'a yemete jam ô nga bo bia.

³⁰ Amu na e Nda Zambe jôé ya Yérusalém, bejô bôt ba ye so a zu ve wo mimveane miap.

³¹ Bamé'é tite é too ésôñ été, nsamba beyôm benyak a bitoñe benyak ya *meyoñ me bôt, tibi'i ba ba nyamete bifase bi moné e mebo si; Tyamela'ane *meyoñ me bôt ma nye'e bita.

³² Ejipte ja ye lôme beta be bôt; Etiôpi ja zu mbi é same mo be Zambe.

³³ Yi'ane Zambe bia, a mia bijôé ya si nyô; yi'ane Nti bia y'ékaña'a.

³⁴ E be nyô a wulu yôb été, yôbe ya nnôm éto; tame yen, a lôme tyiñe jé, éwôlô *tyiñ.

³⁵ Va'ane Zambe duma; nyô étôtok é n'Israél yôp, a ngule jé é ne miñyeme ya yôb été.

³⁶ Zambe a n'angôndô e *nda éndelé jé été, e Zambe Israél a ve bôte bé ngu a éwôlô. Zambe a bo'o ébotan.