BESAM 66 - Kalate Zambe Nnomo a Mfefe Mfefé Nkôñelan

Ekaña'a e be Zambe * nkôté bôt

¹ Asu évete nsamba beyia bia; sam a too jia.

² Sô'ane Nti a zô'é mevak, *si nyô ése

³ yi'ane jôé dé bia; va'ane nye duma a nyiane bia!

⁴ Jô'ane Zambe na: mimboone miôé mi n'éko woñ! Besiñe bôé ba se'e wo amu anene ya ngule jôé.

⁵ Si nyô ése ja kute meboñe si e mise môé a yia bia asu duma dôé.

⁶ Za'an yenane mimboone mi mame mi Zambe! A ne éko woñ éyoñ a bo mboon éziñ e be bone be bôt.

⁷ A nga kôñelane mañ me bo *nkôte si, bôte be nga dañe beta ôsôé a mebo; e valé nye ñhe bi nga va'a be nye.

⁸ A dañe nnôm éto amu ngule jé, mise mé ma fombô *meyoñ me bôt, e bôte ba bene njôan be bo'o te bete bebiene yôp

⁹ mia *meyoñ me bôt, va'ane Zamb'akéva, beta'ane metyiñe menane yôp asu ékaña'a jé!

¹⁰ A ba'ale ényiñe ya nsisime wongan, a nji jô'é na abo dangan é fô'ôsan.

¹¹ Amu ô ve'eleya bia, a Zambe! O ve'eleya bia ane ba ve'ele étyé moné e nduan été.

¹² O nga kee bia avot été, ô nga ka'a bia adite mbe'e angeteñ.

¹³ O nga bo na bôte be wulu bia minlô ane bikabela, bi nga lôt e nduan a e mendime zañ, ve ô nga bo na bi kôlô été asu ya ve bia abui mvom.

¹⁴ Ma ye ke *nda jôé a *bityi'a ba di'i nduan ngumba. Ma ye jalé mintiñetane miam mfa'a wôé;

¹⁵ mintiñetane biyaé biam bi nga tot a anyu dam e nga kobô ôlune viam été.

¹⁶ Ma ye ve wo *bityi'a bia di'ibane ngumba e bi bia dañ avoñ, nalé fe beyôm mintômba a ôlobinda. Ma ye tyi'i benyak a beyôm bikela.

¹⁷ Za'an, wô'an, bia bese mia ko Zambe woñ, a ma ye kañete jam a boya nsisime wom.

¹⁸ Me nga yône nye a anyu dam, a ôyeme viam ô nga wumu nye.

¹⁹ Nge me nga ye yen ékob e nleme wom, Nti a nji ye vô'ôlô ma.

²⁰ Ve bebela a ne na: Zambe a vô'ôlôya ma, a nga wô'ô tyiñe ya meye'elane mam.

²¹ Zambe a bo'ébotan, amu a nji ben meye'elane mam, nge bo na mvame jé é ke m'ôyap.