BESAM 60 - Kalate Zambe Nnomo a Mfefe Mfefé Nkôñelan

Du a nja'ane mvolan

¹ Asu évete nsamba beyia bia. Mbelan ébômébômé ba loone Susam Edut. Same David asu nye'elan.

² Eyoñ a nga wosane bôte ya Siri ya Mézôpôtami a bôte ya Siri ya Sôba a éyoñe Yôab a nga bulan a bôé bôte y'Edom toyini awôm a ébaé e mbi'ili ba loone Sél.

³ A Zambe! Ô maneya bene bia, ô maneya tyame bia; ô wô'ôya bia ôlun, beta'a telé bia tetele;

⁴ ô nga fô'ô si ô nga bôé je; beta'a kôme mimbôlane mite amu si ja ndeñetan!

⁵ O nga bo na bôte bôé be tôban angônda *meve'ele, ô nga nyuu bia woon a ndumetan.

⁶ Ô nga ve bôte ba ko wo woñ, ndem ya yeme tub bilaé.

⁷ Nyi'i bôt a mbo nnôme wôé a yala'ane bia, nalé ate bôte bôé wo nye'e abui ba ye kôtéban!

⁸ Zambe a kobôya e *nda jé é n'étyi été: Ma ma ye dañ. Ma ye kabe Sikem mengap ma ye ve'e mbi'ili Sukôt;

⁹ ma me ne Galad, ma me ne Manasé; Efrayim a ne ékôngô ya nlô wom, Yuda ki ntume wom.

¹⁰ Môab a ne fandé ma wobane nye été; ma wua ékôndé jam Edom. A si Befilisteñ, ma yôtane bita, wô ke bete'e ñhe *tyiñ yôb a wosane ma!

¹¹ Za a ye kee ma e ngungule tison' Za a kee ma Edom'

¹² Ye sa wo a Zambe, nyô a nga bene bia, a nyô a mbe teke fe beta kui a minkane mewosane miangan'

¹³ Va'a bia mvolane ya wosane nyô a siñe bia! nyiane môt ô ne ve momo jôm.

¹⁴ Nsamba wua bia be Zambe, bia ye bo ngule biwôlô bi mam, e nye a ye ko'o besiñe bangan.