BESAM 57 - Kalate Zambe Nnomo a Mfefe Mfefé Nkôñelan

Nja'ane nyian amu bekpwe'ele

¹ Asu évete nsamba beyia bia. Te tyam, same David éyoñ a nga tube Saül e mbas ako'o été.

² Ko m'éngôngo, a Zambe, ko m'éngôngo! Amu nsisime wom wo sobô be wo; ma sobô éjijine ya mefabe môé si, akekui bibubua bi lôteya.

³ Ma yône be Zambe a ne Nkôñe yôp, e be Zambe a wulu mam mese *mvo'é asu dam.

⁴ A ye lôme ma Nkôtan wo so yôp, éyoñe nyô a kpwe'ele ma a ndeñele ma. Zambe a ye lôme mvame jé a bebela wé.

⁵ Nsisime wom ô ne e bengbwengbwem été; me jô'ô ézezañe betite ba yô nduan. Mesôñ me bôte bete, me ne ve mekoñ a bilaé, a ôyeme viab ô ne nkpwaté mekôn ô n'akap.

⁶ Bo'o mbetane yôb été, a Zambe! A étôto'o jôé é yanda'ane *si nyô ése.

⁷ Be nga ya m'avot e mebo si; nsisime wom ô nga vitibi; be nga fa'a m'ébé ôsu, ane bebien be nga ku été.

⁸ Ngul é ne ma *nlem, a Zambe! Ngul é ne ma nlem; ma ye yia bia, ma ye lom wo bia.

⁹ A nleme wom, ve'e oyo! Ve'an ôyo, a mvete jam, a ntyam ateba wom! ma ye vele melende me tyé ôyo.

¹⁰ Ma ye kañe wo e *meyoñ me bôt été, a Nti! Ma ye lom a bia ézezañe mesi asu duma dôé.

¹¹ Amu mvame jôé ja kui yôb été, a bebela wôé e minkut été.

¹² Bo'o mbetane yôp été, a Zambe! Etôto'o jôé é yi'ane si nyôna ése.