BESAM 56 - Kalate Zambe Nnomo a Mfefe Mfefé Nkôñelan

Nja'ane nyian a ntabane Zambe mebun

¹ Asu évete nsamba beyia bia tyiñe jia, é too nyô jia ji: zum e beta bilé bi n'ôyap. Jia David, éyoñe Befilisteñ be nga bi nye e Gad.

² Ko m'éngôngo, a Zambe! Amu bôt ba ko'otô ma: ba bo ma bita ngume nté *môs, ba tibili ma.

³ E bôte ba sili ma si ba ndeñele ma; be n'abui, ba bo ma bita, a Zambe a dañe Nkôñe yôp!

⁴ E môse ma ko woñ, me too wo ndi.

⁵ Ma kañe mejô me Zambe; me too Zambe ndi, me nji ko jôm éziñe woñ; bôt be ne ngule ya bo ma jé'

⁶ Ba ndeñele ma *nsisim a *minkobô, be bili mfa'a wom ve mbia b'asimesan.

⁷ Ba bo bimo'o, ba bole ma, ba fombô bibô'a mebo biam amu ba jeñ ényiñe jam.

⁸ Mvôle nje be too je ndi na ba ye fam ayaa dôé été, a Zambe, sô'ôlô'ô *meyoñ me bôte si!

⁹ Wo lañe medaa mebo ya ndeñendeñ ényiñe wom; nyoñe mili'i mam e nde'e njeñe jôé été; ye mili'i mete me nji bo ntilan e kalate wôé été'

¹⁰ E nde besiñe bam ba ye bulane mvus e môse ma yôn; amu ma yeme na Zambe a ne ngame jam.

¹¹ Ma kañe mejô me Zambe, ma kañe mejô me Nti;

¹² me too Zambe ndi, me nji ko jôm éziñe woñ: bôt be ne ngule ya bo ma jé'

¹³ A Zambe, ma yiane tôé *mintiñetan me maneya bo wo, ma ye bo mame ya ve wo akéva,

¹⁴ amu ô kôtéya nsisime wom awu. Ye sake wo ô nga bo mebo mam na me bo te ku *mbek, ndemben ma ye wulu asu Zambe, éfufube bevevee été.