BESAM 52 - Kalate Zambe Nnomo a Mfefe Mfefé Nkôñelan

Mboone mebun a akum momo jôm

¹ Asu évete nsamba beyia bia, same David,

² éyoñe Doég môte ya Edom a nga zu jô Saül na: David a keya e ndaa Abimélék.

³ Amu jé wo se'e womien e mboon *abé, a mben môt ô n'éyôé' Mvame Zambe ja tabe ngume *môs.

⁴ Oyeme viôé via bôndé ve mbia be mam, ô ne aval an'akabe ôtyenjeñ, wo môta medu'an!

⁵ Wo nye'e *abé e señe mvaé, ékotekot e señe zôsôa nkobô.

⁶ Wo nye'e bifia bise bia balé, a ndaman, a tyam, a wo ôyeme mvô!

⁷ Ajô te Zambe a ye kpwé wo si nnôm éto, a ye dume wo si a vaa wo e *nda éndelé jôé été; a ye té wo e si bevevee.

⁸ Bezôsôô be bôt ba ye yene jame te, ba ye ko woñ, a ba ye woé nye be jô'ô na:

⁹ tama yenane môt a nji nyoñe Zambe aval ane mba'ale wé, v'a nga tabe abui akume dé ndi nlem a nga dañe ngu ve mfa'a ya *abé mame dé!

¹⁰ Ve ma me ne e *nda Zambe aval ane nyumi ôlivié. Me too mvame Zambe ndi nlem nnôm éto a nnôm éto.

¹¹ Ma ye kañe wo nnôm éto, amu ô boya de. Ma ye buni jôé dôé amu ô ne mvaé e be *bebuni bôé.