BESAM 51 - Kalate Zambe Nnomo a Mfefe Mfefé Nkôñelan

Meye'elan asu nsilane njaman

¹ Asu évete nsamba beyia bia. Same David,

² éyoñe *nkulu mejô Natan a nga zu be nye valé David a maneya jô'ôbô nga Batséba.

³ Ko n'éngôngo a Zambe, aval ane mvame jôé é né, aval ane beta nkoon éngôngole wôé a né, tame tyam a fimi mekua mam mese.

⁴ Sôbe ma ngum mfa'a ya ékobe jam a fubu'u ma mfa'a y'abé dam.

⁵ Amu ma yeme mewôé me bôte mam a *abé dam e n'ôsu viam éyoñ ése.

⁶ Wo, wo étam étam me boya *abé, a me boya *abé e mise môé, ajô te wo ye kabe éyoñ wo kobô a ve *melep, a teke bijô éyoñ wo tyi'i mejô.

⁷ Ô lôô, me nga bialé ékob été, a nyia wom a nga nyoñ abume dam *abé été.

⁸ Ve jôme wo yene mvaé édo'o ya *nlem été é ne na bebela; asoé ya be mamien été, bo'o me na me yeme fek.

⁹ Tu'u ma a abua izôp, a ma ye bo mfuban; sôbe ma a ma ye bo éfumulu a dañe Sut;

¹⁰ kate ma foé ñyenane mvaé a mevak nalé ate bives ô maneya buk bia ye fôn.

¹¹ Va'a asu dôé mfa'a mam *abé mam me né, tyame bikobe biam bise,

¹² A Zambe, téé me *nlem ô ne mfuban a beta vumelane a yemete *nsisim ô ne *mvo'é be ma.

¹³ Te wua me fé na me kôlô asu dôé a te vaa ma Mfufube Nsisime wôé.

¹⁴ Bula'ane ve m'ava'a ya nyiane wôé a ma yi na nsisime mbamba nkômban ô su'u ma!

¹⁵ Ma ye ye'ele mezene môé e be bebene njôan, a bebo *abé ba ye bulane be wo.

¹⁶ A Zambe, Zambe ya nyiane wom! kôté'é ma e mekua me nkulane metyi me maneya bo, a ôyeme viam wo ye yôtane *zôsôô wôé.

¹⁷ Ku'i biyaé biam a Nti! a anyu dam da ye yia wo bia y'ékaña'a.

¹⁸ Amu ô nji yene *bityi'a mvaé, ve me nga ye ve wo bie, ô nji kañese *bityi'a ba di'i nduan ngumba.

¹⁹ Metuna'a Zambe a yene mvaé me ne na: Nlem ô ne ntya'an, *nlem ô ne mbiban a ntya'an amu mejôba'ane, a Zambe, ô nji bene wô.

²⁰ Bo'o Sioñ mbamba be mam amu mvame jôé. Lôñe minka'alé ya Yérusalém!

²¹ Eyoñe te wo ye yene *bityi'a ya *zôsôô mvaé, nalé fe metuna'a ba di'i nduan ngumba a mimvean *bityi'a mise. éyoñe te ba ye ve beyôme benyak ata'a metuna'a dôé yôp.