BESAM 5 - Kalate Zambe Nnomo a Mfefe Mfefé Nkôñelan

Meye'elan me môt a ja'é nkaman mfa'a bikotekote bi bôt

¹ Sam David mfa'a évete nsamba bia, be bôme mimfañ.

² Ke'e alo mejô mam, a Nti! Wô'ô ntate wom!

³ Ke'e alo ñyône nloone wom a njô bôte wom a Zambe wom! Wo ma ye'elane nye.

⁴ A Nti, mametyé, wo wô'ô tyiñe jam; mametyé ma tebe wo mis a yange.

⁵ Amu ô nji bo Zambe a yen ékotekote mvaé; *abé e nji tabe vôm ô né.

⁶ Mekute me bôt me ne teke tebe mvo'é e mise môé, wo vini ba bese ba bo ékotekot.

⁷ Wo wôé ba bese ba kobô minsos. Nti a wô'ô bôte metyi a mvô angôndô.

⁸ Ve ma, amu beta mvame wôé, ma ke e *nda jôé, e woñe wo yiane wo été, ma kute meboñe si ôsu ya *nda Zambe jôé é n'étyi.

⁹ A Nti! wulu'u ma e *zôsôô wôé été; amu ba ba wosane ma, kôme zene jôé nje'ese ôsu viam.

¹⁰ Amu teke jame ya buni e mejô mab été, minleme miab été mi ne ve bilik, éngoñe jabe ki ve soñ é yoo, ôyeme viab ba bo wô medu'an.

¹¹ Bo'o be ane bôt ba yiane mekua, a Zambe! mam ba bôndé me kele be na be ku! Bene be amu bizu'u mewôé me bôte map, amu ba bene njôane wôé.

¹² Eyoñe te ba bese ba sobô be wo ba ye vak. Ba ye fône nnôm éto a wo ye kamane be; ba ye va'a be wo, ba bese ba nye'e jôé dôé.

¹³ Amu wo Nti, wo botane zôsôa môt, wo bômane nye *mvam an'ében.