BESAM 49 - Kalate Zambe Nnomo a Mfefe Mfefé Nkôñelan

Asu'u môt a too akume mebun

¹ Asu évete nsamba beyia bia. Same bone be Koré.

² Vô'ôla'ane jame di, mia bôte bese, ke'an alo, mia bôte bese mi too *si nyô.

³ Mia bôbetok a bôbenen, minkukum a minzôzoé nsamba wua!

⁴ Anyu dam da zu kobô mejô me fek, a nleme wom wo bindi asimesane mfefek.

⁵ Ma kee melo mfa'a ya minkana mi fek, e mam me ne mesoé, ma timi me a tyiñe mvet.

⁶ Amu jé me nga yiane wo ko woñ e mimôse ya njuk, éyoñ besiñe bam ba vute ma *abé mame dab e nyô'

⁷ Be too mvaé jabe ndi *nlem, a se'e bebien amu abui akume dap.

⁸ Be se ngule ya nyii bebien nyôna a nyii nyô mbok, nge ya'ane Zambe tañe ya kôté bebien.

⁹ Nkôtan ya nsisime wob ô ne tañ anen a wo ye bo teke boban.

¹⁰ Teke be ye'e nyiñe nnôm éto, a teke be ye'e sa'ale ébé soñ.

¹¹ Amu da ye yené na: mimfefek mia wu, akut a môt a n'asuk be fe ba wu, ba li'i bôte befe akume dap.

¹² Ba simesane na menda me bôte map ma ye tabe nnôm éto, a bitaba'a biabe ki ataté miaé wu a kui wu ôvok, be ne bôt be nga yôlé bifuse mesi e môé map.

¹³ Ve môta duma a nji tabe, a funane betit ba wu.

¹⁴ Zene jabe le, akute mboone dap, a bôte ba tôñe be ba yene *minkobô miabe mvaé.

¹⁵ Be ne ntelan aval ane mbam mintômba étaba'a miñwuan, a ana'ana bôt be ne zôsôô ba ye tibi be a mebo. Abeñ dap ve mane jañ, a vôm ya miñwuan a ye bo mvô'ô jap.

¹⁶ Ve Zambe a ye kôté nsisime wom étaba'a miñwuan, amu a ye nyoñe ma:

¹⁷ te ko woñ éyoñe môt éziñ a bi'i kum, éyoñ mefo'o ya *nda jé ma nen;

¹⁸ amu a nji kee jôm éyoñ a wu, mefo'o mé me nji tôñe nye soñe si.

¹⁹ A ne nguleya yené mevak éyoñ a vee, ba ye semé wo amu ô nga bi mvom.

²⁰ Ve da na wo ye ke éjô'ôba'a b'ésoo, mbe bete ba ye bo te beta yen éfufube nnôm éto.

²¹ E môt a bili duma, ve teke fek, a funane betit ba wu.