BESAM 48 - Kalate Zambe Nnomo a Mfefe Mfefé Nkôñelan

Abeñ a étôto'o Sioñ

¹ Jia. Same bone be Koré.

² Nti a n'anen, a ne nyô a yiane bikaña'a bise, e tisone Zambe wongan, e nkôle wé ô n'étyi.

³ Nkôl ô n'abeñ, ava'a ya si ése, nkôle Sioñ: mfa'a y'akôé, e tisone beta njô bôte le.

⁴ Zambe, e biwôlô menda bié été, ba yeme nye ane beta asoé.

⁵ Amu ô lôô na bejô bôt be nga kui *tyiñ, be nga wulu nsamba wua.

⁶ Be nga fombô, menyu me yoo, woñe minlem, e nde be nga mate.

⁷ Valé nye minti'itan mi nga bi be ane mintaé mi minga a biaé,

⁸ aval an'évuñulu ya mfa'a jôbe da tôô, e nje ja bôé bemiele ya Tarsis.

⁹ Jame bi nga wôk, bi nga yene de e tisone Nti ya *minsamba mewosan, e tisone Zambe wongan, Zambe a ye yemete je éyoñ ése.

¹⁰ A Zambe, bia simesane mvame jôé ézezañe *nda Zambe jôé.

¹¹ Aval'ane jôé dôé, a Zambe, e né, duma dôé da wô'é a kui meku'u ya si nyô; mbo nnôme wôé ô ne njalan a *zôsôô.

¹² Nkôle Sioñ wo vak, bengone be Yuda be ne mefôn été amu mintyi'ane mejô miôé.

¹³ Wula'an e Sioñ a bôma'ane nye, lañane metyi'ilane mé.

¹⁴ Fomba'an ôleme vié, mi tuka'a fombô biwôlô menda bié nalé mia ye kañete miaé bôt wo zu.

¹⁵ Zambe a n'éñwongan e nye le, nnôm éto a nnôm éto; a ye bo nliti zene wongan a kui awu.