BESAM 44 - Kalate Zambe Nnomo a Mfefe Mfefé Nkôñelan

Ô beneya bia

¹ Asu évete nsamba beyia bia. Same bone be Koré.

² A Zambe, bi nga wôk a melo mangan, bésaa bangan be nga kañete bia, e mam ô nga bo éyoñe jap, e melu mvus.

³ O nga wôlé *meyoñ mesi a wo wôé, asu ya tooé be été, ô nga bibi *meyoñ me bôt asu ya volô be na be mialan.

⁴ Amu na saa ñhe ke nkpwaté mekône wop ñwô be nga nyoñe wô si be too nyô, saa ñhe wo wop ñwô ô nga nyii be; ve mbo nnôme wôé, e wo wôé, éfufube y'asu dôé. Amu ô nga yene be mvaé.

⁵ A Zambe, wo ô ne njô bôte wom: Bendé'é a ve *tyiñ ya nyii Yakob!

⁶ Bia be wo bia kpwé besiñe bangan e si, amu jôé dôé, bia mane ko'o bôte ba kôlô si a wosane bia,

⁷ Amu me nji tabe *élaé ma wua mebun, saa ñhe ke nkpwaté mekône wom ñwô wo ye nyii ma;

⁸ Ve wo wo nyii bia e be besiñe bangan a wo'o ba ba vini bia ôsone nyô.

⁹ Bi too mebun *môs ôse be Zambe, a bia kañe jôé dôé nnôm éto.

¹⁰ Ve da ô nga bene bia, ô nga wo'o bia ôson a nyôl ése. O nji beta kui a minkane mewosane miangan;

¹¹ wo bo na bi bulane mvus e mise besiñe bangan; a ba ba vini bia ba telé bia soé asu mfi wop.

¹² Wo kuane bia ane biyem ba ke tyik Wo tyamelane bia e *meyoñ bikul été.

¹³ Wo kuane bôte bôé ko'osin O nji yene be nya jômô.

¹⁴ Wo bo bia jôm ôson e be bôte bia be be bi too bebé, jôme ékpwe'ele a viôé e be bôte ba bômane bia.

¹⁵ Wo bo bia *nkana meyoñe bikuu, ba si'isi bia nlô e bôt été;

¹⁶ ôson ô ne m'ôsu éyoñ ése, a ôsame a jaéya m'asu,

¹⁷ éyoñe ma wô'ô tyiñe nyô a samele ma a biasé ma, éyoñe me lôô môta ziñ a môt akuna'a, nsiñ a nkun.

¹⁸ Mam mete mese ma kui be bia, ve bi nji ke vuane wo, a bi nji ke tyam élate jôé;

¹⁹ nleme wongan ô nji ke yale feñ a mebo mangan me nji ke kôlô zene jôé,

²⁰ ane ô ne ko'o bia e vôm ya nkôte si a buti bia a dibi y'awu.

²¹ Nge bi nga vuane jôé Zambe wongan, nge bi nga same mo mangan e be *zambe bikuu,

²² ye Zambe a nji ye yeme de, nyô a yeme minsolane mi mam ya *nlem'

²³ Ve amu wo e nde ba tyi'i bia *môs ôse, e nde ba yene bia ane mintômba ba ke wôé.

²⁴ Kôlô'ô si! amu jé wo ke ôyo, a Nti' Ve'e ôyo! Te bene bia nnôm éto!

²⁵ Amu jé wo solé asu dôé' Amu jé wo vuan bidime biangan a étibela'a jangan'

²⁶ Amu nleme wongan ô ne nte'an e mbulu'u été, nyôle jangan ja ke lat a si.

²⁷ Kôlô'ô si na ô volô bia! Kôté'é bia amu mvame jôé!