BESAM 41 - Kalate Zambe Nnomo a Mfefe Mfefé Nkôñelan

Meye'elane me môt a tôban ékpwe'ele

¹ Asu évete nsamba beyia bia: Same David.

² Ebotan a nyô a simesane *nzôzoé a ntete'e môt E môse bidim, Nti a kôté nye;

³ Nti a ba'ale nye a bo nye na a nyiñ a bili ébotan e si nyô; wo ye bo te kee nye e nkômbane besiñe bé.

⁴ Nti a wônô nye énoñ ôkone jé yôp; wo beta kôm éjô'ôba jé éyoñ y'ôkone vié.

⁵ Ma jô na: a Nti, ko nja'a m'éngôngo! Yete'e nsisime wom, amu me boya wo *abé.

⁶ Besiñe bam ba kobô ma *abé be jô'ô na: a ye wu éyoñ évé' Jôé dé da ye jañ éyoñ évé'

⁷ Nge môt éziñ a zu jome ma a kobô bemomo bifia. Nleme wé wo kôane mbia mimboon éyoñ a kui atan, a nga ke a kobô de vôm ase.

⁸ Bôte bese ba vini ma ba la'an afôfoé be wosa'ane ma. Ba simesane na bidim bi bili ma bia zu jañele ma, be na:

⁹ Mbia ajô nye a kui be nye, a éyoñ a mbôô si ji, a ye bo te beta kôlô si.

¹⁰ Ja'ane nya mvôé wom me nga nyiñe nye *mvo'é, nyô a nga bili ndi nleme jam, nyô a nga di bidi biam, a bete étimekili ya wosane ma.

¹¹ Ve wo, a Nti, ko m'éngôngo a bete ma si! A ma ye bulane be jôm é n'énjap.

¹² Jame di nde ma yeme na wo nye'e ma: amu nsiñe wom a nji dañe ma.

¹³ A wo ô nga su'u m'éfak amu *zôsôô wom, a ô nga telé ma vôm ô né nnôm éto.

¹⁴ Ebotan a Nti, e Zambe Israél, Nnôm Eto a Nnôm Eto! Amen! Amen!