BESAM 40 - Kalate Zambe Nnomo a Mfefe Mfefé Nkôñelan

Bôte bese ba yiane yeme jam ô nga bo ma

¹ Asu évete nsamba beyia bia, Same David.

² Me nga ve ndi nleme jame be Nti; a nga lumbu mfa'a wom, a nga wô'ô ñyône wom.

³ A nga dutu ma ébé ya njañ, e mboto'o si; a nga telé mebo mam akôme yôp a yemete medaa mebo mam e si.

⁴ A nga futi mfefé jia anyu dam été, jia ékaña'a asu Zambe wongan; abui bôt da ye yene nye a ba ye ko woñ; ba ye ve ndi jabe be Nti.

⁵ Ebotan a môt a futi ndi nleme jé be Nti a nji kôñelane be bôt be ne mbia anyu a benye'e minsos!

⁶ A Nti, e Zambe wongan ô boya bitôto'o bi mame biôé a asimesane dôé abui asu dangan; teke jôm é ne ve'ane wo; ma kômbô beta kate de a ba'alane yôtane de; bi ne étua abui teke avale me ne kañete.

⁷ O nji kômbô *bityi'a nge mimvean ô nga kui ma melo ya wôk, ô nji sili metuna'a ba di'i ngumba nge *bityi'a asu *abé.

⁸ E nde ma jô na: ô lôô, ma zu me bili mvulekane kalate ô ne ntilan asu dam.

⁹ Ma yene mvaé ya bo nkômbane wôé, a Zambe wom! A metiñe môé me ne nleme wom été.

¹⁰ Ma kate mbamba foé ya zôsôô e beta ésulan été; ô lôô, me nji dibe biyaé biam, a Nti, wo yeme nalé!

¹¹ Me nji solé *zôsôô wôé e nleme wom été. Ma kañete ajô ya bebela wôé a nkôtane wôé, me nji solé mvame jôé a bebela wôé e beta ésulan été.

¹² Ve wo, a Nti, wo ye bo te nyume ma mame ya nkoon éngôngole wôé; mvame jôé a bebela wôé bia ye ba'ale ma kom ése.

¹³ Amu, minjuk mi ne tek'alañé, mia bômane ma; bikobe biam bia tôñe ma mvus a me se ngule ya jibi na me yene bie; bi n'abui a dañe ésile ya nlô wom a ngule nleme jam é maneya ma.

¹⁴ A Nti, tame kañese kôté ma! A Nti, bo'o avôle ya kôté ma!

¹⁵ Bese fufulu be woba'an ôsame a bili ôson, e bôte ba jeñe ényiñe jame na be vaa je. Be bula'ane mvus a wô'ô ôson, e ba bese ba yi ma awu!

¹⁶ Woñ ô bi be amu ôsone viap! Ba ba jô me na: Eñhee! eñhee!

¹⁷ Ba bese ba jeñe wo be va'ak a fône be wo! E bôte ba nye'e nkôtane wôé be jô'ô éyoñ ése na: Nti a wumuk!

¹⁸ Ma me n'éngôngo a azoé; ve Nti a simesane ma. O ne mvolane wom a *nkôté wom: a Zambe wom, te wo beta bem!