BESAM 36 - Kalate Zambe Nnomo a Mfefe Mfefé Nkôñelan

Nti, anjeñe y'ényiñ

¹ Asu évete nsamba beyia bia: Sam David mbo ésaé Nti.

² Nkobô mbo *abé a bene njôan ô ne ma *nlem été, a nji yen amu jé a yiane ko Zambe woñ.

³ Amu a dañ bo émien mebun, éyoñe te a bo te yen ékob jé a vini je.

⁴ Mejô y'anyu dé me ne mvô a medu'an; a bene mfasan a mboone mvaé.

⁵ Enoñe jé yôp a fase mvô, a tebe e *zen é nji bo mvaé, a nji vini *abé.

⁶ A Nti! mvame jôé ja kui yôp, a *zôsôô wôé a kui minkut.

⁷ Zôsôô wôé a ne v'ane beta minkôle mi Zambe, mintyi'ane mejô miôé v'ane beta yee. A Nti, wo nyii bôt a betit.

⁸ A Zambe, abim avé mvame jôé é n'édima! Bone be bôt ba ye sobô éjijine ya mefabe môé si.

⁹ Ba jaé a afo'o ya *nda jôé, a wo nyuu be mendim m'ôtôñe ya meva'a môé.

¹⁰ Amu anjeñe y'ényiñ é ne fefele jôé; bia yen éfufup amu éfufube jôé.

¹¹ kelee mvame jôé ôsu e be ba ba yeme wo, a ntyi'ane mejô wôé e be ba nleme wop ô ne *zôsôô!

¹² Abo môta mebun e bo'o te nambe ma, a wo bebo *abé ô bo'o te bo na me tup!

¹³ Vôm ate nye bikotekote bi bôt bia ku; ba ku kayale a be se ngule ya beta tebe tetele.