BESAM 34 - Kalate Zambe Nnomo a Mfefe Mfefé Nkôñelan

Nti a kôté nyô a ko woñ

¹ Sam David éyoñ a nga veñ akut asu Abimélék a nkean a nga ke éyoñ Abimélék a nga titane nye.

² Ma ye kañe Nti biyoñ bise; ékaña'a jé ja ye bo anyu dam éyoñ ése.

³ Nleme wom wo yen avak e be Nti. Besili bebiene si be wô'ôk a vak!

⁴ Bia be mia nyeñela'ane Nti! Nwumela'ane jôé dé nsamba wua!

⁵ Me nga jeñe Nti, nde a nga yalane ma; a vaa ma e woñe wom ôse été;

⁶ Eyoñe ba fombô nye, ba faé a mevak a asu e ne teke yiane wô'ôson.

⁷ Eyoñ éngôngole môt ja yôn, Nti a wôk, a a nyii nye alune dé ese.

⁸ Engele Nti a bômane ba ba ko nye woñ, a a kôté be.

⁹ Tama tye'an a yen abim avé Nti a ne mvaé! Ebotan a môt a sobô be nye!

¹⁰ Koone Nti woñ, mia mimfufube mié! Amu jôm éziñ é nji jeñeban e be ba ba ko nye woñ.

¹¹ Bone bengbwengbwem ba wô'ô zaé a évé, ve ba ba jeñe Nti be nji jeñebane mvaé éziñ.

¹² Zakan, a bone bam, vô'ôla'ane ma! ma ye ye'ele mia woñe Nti.

¹³ Môte *mbé a kômbô ényiñ, *mbé a nye'e ayabe melu mfa'a ya yene mvom'

¹⁴ Kama'an ôyem mfa'a y'abé a biyaé biôé mfa'a mejô medu'an.

¹⁵ Sa'ale'e *abé a bo'o mvaé; jeñe *mvo'é a tôñesane je.

¹⁶ Mise me Nti me lôô bezôsôô be bôt a melo mé ma vô'ôlô miñyône miap.

¹⁷ Nti a kôñelan asu dé e ngame yate ya ba ba bo abé mfa'a ya vaa *nsimesan ba simesane be e *si nyô.

¹⁸ Eyoñe bezôsôô be bôt ba yôn Nti a wôk, a a vaa be alune dab ese;

¹⁹ Nti a ne bebé a ba minlem mi ne ntya'an, a a nyii ba minsisim mi ne mbiban.

²⁰ Abui bidim da kui be zôsôa môt, ve Nti a kôté nye mfa'a ya bidim bite bise.

²¹ A ba'ale bivese bié bise, teke jia y'été é ne mbu'an.

²² Bidim bia bo na mbo *abé a wu, a bevini *zôsôô môt ba ye nyoñe mekua.

²³ Nti a kôté nsisime bebo bisaé bé. A ba bese ba sobô be nye ba ye fame *melep.