BESAM 32 - Kalate Zambe Nnomo a Mfefe Mfefé Nkôñelan

Mba jam a ne na ô nyoñe njaman

¹ Ebotan a nyô ntyamane metiñe wé ô vasebaneya, nyô *abé dé e ntoo *njaman.

² Ebotan a môte Nti a nji beta lañ *abé dé, a nyô medu'an me nji yené e nsisime wé été!

³ Nté me nga too évô, bivese biam bi nga dik, me nga tat ngume môs;

⁴ amu alu a *môs, wo wôé ô nga titi me yôp, ngule jam é mbe ve mfum, ane wu ya ésep.

⁵ Me nga bo na ô yem *abé dam, me nji buti *abé dam; me nga jô na: Ma ye mem mintyamane metiñe miam e be Nti! a wo ki ô nga vaa ékobe y'abé dam.

⁶ Nalé ate mbuni ase a ye'ela'ane wo éyoñe ja yian! Nge beta mendim ma kui ndôn, ma ye bo te nambe nye, teke bebé.

⁷ Ô ne asoé dam, wo kamane ma mfa'a ya melunga, wo bômane ma a ayenga *nkôtan.

⁸ Ma ye ye'ele wo a liti wo zene wo yiane tôñ; ma ye ve wo *melep, mise mam ma ye fombô wo.

⁹ Te funan ékabela nge tit ja bialé zañe ékabela a éjakas nje é ne teke fek. Ba liti bie *zen a kandé a mesôñ ba jalé be, nalé ba ye bo te subu wo bebé.

¹⁰ Mbo *abé a tôban abui njuk, ve nyô a kee émiene be Nti, mvame jé ja bômane nye.

¹¹ A bezôsôô be bôt, va'ane be Nti a taba'an e mefôn été! Mia bese mi ne zôsôô e minleme mienan été, yôta'an ayenga mevak!