BESAM 30 - Kalate Zambe Nnomo a Mfefe Mfefé Nkôñelan

Zambe a bulane ve ntili sam ényiñ

¹ Jia asu mveane Zambe Nda. Sam David

² Ma se'e wo a Nti, amu ô beteya ma si, ô nji jô'é besiñe bame na be vak amu ajô dam.

³ A Nti, Zambe wom! me nga yône be wo ane ô nga saé ma.

⁴ A Nti! ô nga vaa ma vôme miñwuan mi né. Ô boya me na me nyiñ ôyab a ba ba sis ébé si.

⁵ Loma'ane bia asu duma Nti, mia *bebuni bé. Kañane jôé dé e n'étyi!

⁶ Amu ayaa dé da tabe mone nté. Ve mvame jé ja tabe ngume nté ényiñ; miñyôn mia bo mamengô'é, mametyé ki mefôn.

⁷ E *mvo'é jam été me nga jô na: Ma ye bo te fô'ôsan éyoñ éziñ!

⁸ A Nti! Amu mvame jôé, ô nga yemete nkôle wome ngu. Ô nga solé asu dôé a jame te e nga fô'ô me *nlem.

⁹ A Nti! me nga yône be wo, me nga ye'elane Nti;

¹⁰ mfi ô ne wo vé na ô kuli metyi mam, na ô bo na me sis beta ébé été' Ye mbuluk wo ye kañe wo' Ye mbuluk wo ye kañete bebela wôé'

¹¹ Vô'ôlô'ô, a Nti, mvama'ane ma! a Nti, bo'o mvolane wom!

¹² O veñesaneya ôlune viam ô bo mefôn, ô tiiya nkuta wom a jalé ma mevak.

¹³ Nalé ate nyôle jam ése ja ye lomé bia amu duma dôé a bo te tabe évô. A Nti, e Zambe wom! Ma ye kañe wo nnôm éto.