BESAM 29 - Kalate Zambe Nnomo a Mfefe Mfefé Nkôñelan

Tyiñe Nti

¹ A bone be Zambe, va'ane Nti, va'ane Nti duma a ngu!

² Va'ane Nti duma da yiane jôé dé! Kutane meboñe si asu Nti mi be'e mengômesan me n'étyi!

³ Tyiñe Nti ja wô'é e mendime yôp e Zambe a n'étôtok a bo na zo'oyañ é bam; Nti a ne e beta mendime yôp.

⁴ Tyiñe Nti a ngul ése, tyiñe Nti a éjijin ése.

⁵ Tyiñe Nti ja bu'u besédre; Nti a bu'u besédre ya Libañ.

⁶ A bo be na be tyele ane étoñe nyak: Libañ a Sirioñ ane étoñe nyat.

⁷ Tyiñe Nti ja kuli minkaba'a mi nduan.

⁸ Tyiñe Nti ja bo *nkôte si na ô fô'ôban; Nti a bo *nkôte si ba loone Kadés na ô fô'ôban.

⁹ Tyiñe Nti ja bo beyale minko'o na be biaé, ja kpwé bilé y'afan. A e *nda njô bôte jé été jôm ése ja yôtane na: Duma!

¹⁰ Eyoñe ndôn é nga kui Nti a nga too éto njôane jé, Nti a too éto njô bôt nnôm éto.

¹¹ Nti a ye ve bôte bé ngu; Nti a ye botane bôt y'ayoñ dé a mefo'o ya *mvo'é été.