BESAM 26 - Kalate Zambe Nnomo a Mfefe Mfefé Nkôñelan

Môt a ne te bijô a loone Zambe

¹ Tyi'i ma ajô, a Nti! Amu ma wulu e *mvo'é été, me nga kee ndi jame be Nti, ma ye bo te yeñelan.

² Fase ma, a Nti! ve'ele'e ma, ve'ele'e ôsimesane viam a nleme wom.

³ Amu mvame jôé é ne ôsu ya mise mam, a ma wulu e bebela wôé été.

⁴ Me teke tabe vôme bikotekote bi bôt bi too, bia be bôte bebadu'u teke wulu nsamba;

⁵ Ma vini ékôane bôt ba bo *abé. Bia be bôt be n'abé teke tabe vôme wua.

⁶ Ma sôbe mo mam e te-ke-bijô été, a ma bôman ata'a metuna'a dôé a Nti!

⁷ Asu ya bo na tyiñe mvean akéva é wô'é, a beta kañete bitua bi mame biôé.

⁸ A Zambe! ma nye'e ntabane ya *nda jôé, e vôm étôto'o jôé é too.

⁹ Te vaa nsisime wom bia bebo *abé nsamba, nge vaa ényiñe jam nsamba a bôte metyi,

¹⁰ mbe be bili ôsame e mo map, a mbo nnôm njalan a bifa'aé!

¹¹ Ma ma wulu e *mvo'é jam été; kôté'é ma a mvamane ma!

¹² Abo dam e tele *zôsôô été; ma ye kañe Nti e bikôan été.