BESAM 25 - Kalate Zambe Nnomo a Mfefe Mfefé Nkôñelan

Ma kômbô yeme minkômbane miôé, jamé'é fe ma minkobane miam

¹ Ma bete nleme wome be wo a Nti.

² Me too wo ndi, a Zambe wom: te ma woban ôson! a besiñe bam be bo'o te fôn ajô dam!

³ Ba bese ba yange mvolane wôé ba ye bo te woban ôson; ve ba bese ba koñe bôt amu momo, mbe ba ye woban ôson.

⁴ A Nti, bo'o me na me yeme mezene môé. Ye'ele'e ma mezene môé.

⁵ Bo'o me na me wulu bebela wôé été a ye'ele'e ma; amu ô ne Zambe ya nyiane wom, ma yange mvolane wôé mimôse mise.

⁶ A Nti, simesa'ane nkoon éngôngole wôé a mvame jôé, amu bi ne aso nnôm éto.

⁷ Te simesan *abé ya me too ésoé, nge mbenan éjôé wom; simesa'ane ma aval'ane mvame jôé é né, amu mbamba fulu wôé, a Nti.

⁸ Nti a ne mba fulu a *zôsôô! Ajô te nde a liti bebo *abé zen.

⁹ A wulu bôte ba sili bebiene si e *zen é ne *zôsôô, a ye'ele be zene jé.

¹⁰ Mezene me Nti mese me ne *mvam a *zôsôô, asu ba ba ba'ale élate jé a minjôane mié.

¹¹ A Nti, wo ye jamé ékobe jam amu jôé dôé, amu ékobe te é n'angôndô.

¹² Môte *mbé a ko Nti woñ' Nti a liti nye *zen a yiane top.

¹³ Nsisime wé wo ye wo'on e mvom été, a mvoñe bôte jé ja ye nyoñe si.

¹⁴ Osimesane Nti a solé ô ne asu ba ba ko nye woñ, a nalé a ne amu na a liti be élate jé be yeme je.

¹⁵ Mise mam me lôô kom ése mfa'a Nti a né. Amu nye a vaa mebo mam avot.

¹⁶ Kôñela'ane be ma a mvamane ma, amu me n'étam a éngôngo.

¹⁷ Biyebe bi jaéya ma nlem; bo'o me na me kôlô biyebe biam été.

¹⁸ Yene azoé dam a nju'u wom a jamé'é *abé dam ese.

¹⁹ Yene abim avé besiñe bam be n'abui, a abime ôviti'i ziñ ba siñe ma ô né.

²⁰ Ba'ale'e nsisime wom a kôté'é ma! me bo'o te woban ôson éyoñe ma sobô be wo!

²¹ Kañese'e na *mvo'é a *zôsôô bi ba'ale ma, amu ma futi ndi jam e be wo!

²² A Zambe! kôté'é Israél mfa'a ya alune dé ese.