BESAM 21 - Kalate Zambe Nnomo a Mfefe Mfefé Nkôñelan

Njô bôt a too Zambe ndi nlem

¹ Asu évete nsamba beyia bia: Same David.

² A Nti, njô bôt a vak amu ngule jôé; abim avé nyiane wôé wo jalé nye a mefôn!

³ O nga ve nye jôme nleme wé ô nga kômbô, a ô nji nyume nye jôme biyaé bié bi nga kômbô.

⁴ Amu wo zu ôsu vié a bibotan bi n'étua mvaé, wo jalé ékate nya or e nlô wé.

⁵ A nga sili ényiñ, ô nga ve nye je, nalé fe ayabe melu, nnôm éto a nnôm éto.

⁶ Duma dé e n'anen amu nyiane wôé. Wo jalé nye mfaan a étôtok.

⁷ Wo bo nye môta bibotane nnôm éto. Wo jalé nye mevak ôsu viôé.

⁸ Njô bôt a too Zambe ndi, a amu mvame Nyô a ne ôyabe yôp, a nji fô'ôsan.

⁹ Wo wôé wo ye koone besiñe bôé éyoñ ése, mbo nnôme wôé wo ye koone ba ba vini wo.

¹⁰ Wo ye bo be ane mbe'e nduan wo dañ ayôñ e môse wo ye yené; Nti a ye mine be ayaa dé été, a nduan ja ye mine be.

¹¹ wo ye jiane mvoñe bôte jab e *si nyô, a mvoñe jé e bôt été.

¹² Be bôndéya wo *abé, be ve'eya fe'e mbia b'asimesan, ve ba ye bo ngule momo.

¹³ Amu wo ye bo na be lume mvus, a wo ye wua be *élaé jôé.

¹⁴ Kôlô'ô si a ngule jôé, a Zambe! bia kômbô yia bia a lomé besam asu duma ya ngule jôé.