BESAM 20 - Kalate Zambe Nnomo a Mfefe Mfefé Nkôñelan

Meye'elan asu ya dañe besiñ

¹ Sam asu évete mbamba beyia bia, Sam David.

² Nti a yala'ane wo e *môs ô bili njuk, jôé Zambe Yakob e ba'ale'e wo!

³ A lôme wo mvolan a too e vôm a n'étyi, a simesa'ane wo a too e Sioñ!

⁴ A simesa'ane mimveane miôé mise, a a kañese'e mimveane miôé ba di'i ngumba!

⁵ A va'a wo e jôme nleme wôé wo kômbô, a a tôék asimesane dôé ese.

⁶ Bia ye yôtan a mevak amu nyiane wôé. Bia ye bete nlinga a jôé Zambe wongan. Nti a ye tôé minja'ane miôé mise.

⁷ Ma yem éyoñe jina na Nti a nyii e môte wé a ne *ñwo'one mbon, a ye yalane nye a too e vôme wé a n'étyi yôp a éwôlô mvolan ya mbo nnôme wé.

⁸ Bevok be too bevagoñe bita babe ndi *nlem, ba bevo'o ki bikabela biap, ve bia bia loone Nti e Zambe wongan.

⁹ Be ba kobetan a ku si, ve bia bi tele tetele ne bip.

¹⁰ A Nti, nyi'i njô bôt! a yala'ane bia éyoñe bia loone nye.