BESAM 2 - Kalate Zambe Nnomo a Mfefe Mfefé Nkôñelan

Njô bôte Zambe a nga wo'o mbon

¹ Amu jé meyoñe bikuu ma ngômelan a amu jé bôt be bili momo asimesan'

² Bejô bôte ya *si nyô ba tebe tetele a bivet bia vute ngame ya wosane Nti a éñwé a ne *ñwo'one mbon:

³ bi tame té mengata'a map, a bi tame wua bengôkobe bap ôyab a bia!

⁴ Nyô a too yôp a woé, Nti a kpwe'ele be

⁵ A kobô be ayaa dé été, a bo na be ko woñ ayo'o dé été.

⁶ Ma me teléya njô bôte wom e Sioñ yôp, nkôle wom ô n'étyi!

⁷ Ma ye yôtane ntyi'ane Nti; a nga jô me na: Ô ne mone wom, ma ñhe me biaéya wo e môse wu.

⁸ Sili'i ma, a ma ye ve wo *meyoñ bikuu ane ngap, a ve wo meku'u me si ane jôme jôé;

⁹ wo ye bu'u be a *ntum étyé, wo ye bôé be bifuse bifus ane vie'e mmé meviek.

¹⁰ Eyoñe ji, a mia bejô bôt, bo'one fek! a mia betyi'i mejô ya *si nyô, nyoñane ñye'elan!

¹¹ Bo'one Nti ésaé a woñ ôse, fônan mi fô'ôba'an.

¹² Wumula'ane mon anyu a za yaa, a mia ki mi za jañ e zene jenan été amu ayaa dé e n'avôle ya kalane nduan. Ebotan é ne be ba bese ba sobô be nye.