BESAM 19 - Kalate Zambe Nnomo a Mfefe Mfefé Nkôñelan

Etôto'o Zambe émo été. Metiñ me Zambe

¹ Asu évete beyia bia, Sam David.

² Yôb da kañete étôto'o Zambe a ñyeme yôb wo yôtan ésaé ya mo mé.

³ Môs wo tyeñele wu ôvok mam mete a alu da kate foé y'été e be alu avok.

⁴ Biôme bite bi nji bo nkobô nge bifia, a tyiñe jab é nji ke wô'é.

⁵ Foé jab ja wulu e si ése a ba wô'ô nkobô wob a kui susu'a ya *si nyô, e vôm a nga lame *nda éndelé asu jôp,

⁶ nde da kui atan aval ane mbom wo kôlô étune *nda jé, aval ane mben wo ke mbi e zene jé a meva'a mese.

⁷ Jôbe te da kôlô aku'u yôbe di a kui aku'u avok, a teke jôm é ne fame minkôkô mié.

⁸ Metiñe me Nti me ne nya mvo'é ma bulane ve môte nguleya nyiñ, mebendé me Nti me ne jôme ya tabe je ndi, ma volô mimfefe'e na mi yeme nyiñ.

⁹ Memvinda me Nti me ne *zôsôô, ma ve nleme mevak, mebendé me Nti me n'éngengeñ, ma volô môte na a bo fek.

¹⁰ Nkoone Nti woñ ô ne jôme ja wô'é ne ngeññ, a wo tabe nnôm éto. Mintyi'an mi Nti mia yian; mise, teke vaa wua, mi bili beamu.

¹¹ Mi ne jôme ya nyamete a dañe or, *zam a dañe wôé, a dañe nkone y'ésia wôé *zam.

¹² Mbo ésaé wôé émiene fe a nyoñeya ñye'elane y'été, a a yene de beta mfi na a ba'ale me.

¹³ Za a ne nguleya yeme minkobane mié a bo e fu'an' Jamé'é ma mfa'a ya mam me ne ma nsolan.

¹⁴ O kamane fe mbo ésaé wôé e be bôt be ne mebun; be bo te tibi ma yôp! Eyoñe te ma ye bo *mfuban a te bijô mfa'a y'abé da dañ *abé.

¹⁵ Kañese'e nyoñe mejô y'anyu dam a mbindane mame ya nleme wom e vôm ô né, a Nti, akôme dam a *nkôté wom.