BESAM 17 - Kalate Zambe Nnomo a Mfefe Mfefé Nkôñelan

Nja'ane nkaman mfa'a besiñ

¹ A Nti, vô'ôlô'ô jam e ne *zôsôô, wô'ô ñyône wom; ke'e alo e meye'elane mam mme biyaé bi ne te medu'an bia bo.

² Ntyi'ane y'ajô dam ô so'o be wo, mise môé me yenek e vôme *zôsôô a né;

³ ô faseya nleme wom; wo jome wô a alu; ô ve'eleya ma, teke yene jôm. Jam me maneya simesan e nji tulan anyu dam.

⁴ Eyoñe ma yene mimboone mi bôt, a amu mejô ya biyaé biôé, ma tabe mezene me bôt be n'évô ntyee.

⁵ Medaa mebo mam me ne ngu e mezene môé été, mebo mam me nji yeñelan.

⁶ Ma loone wo, a Zambe! amu wo yalane ma; viti'i alo dôé be ma, vô'ôlô'ô nkobô wom!

⁷ Wo wo nyii ba ba jeñ asoé, liti'i bitua bi mame ya mbamba mimboone miôé.

⁸ Ba'ale'e ma ane nyia dis; solé'é ma éjijine ya mefabe môé si,

⁹ amu bikotekote bi bôt bia kpwe'ele ma, amu besiñe bam ba vebe ze mbe ba bômane ma.

¹⁰ Be boya minleme miab ayet mfa'a ôsimesan ôse y'éngôngo *minkobô miab mi ne njalan a mebun.

¹¹ Be tôñeya ma mvus, mbe le be bômaneya ma; a ba jeñ *zen ya dume me si, mise mab me beme me nyôl

¹² ane bengbwengbwem be solô ésaé, ane miñyôyo'o betit mi ne ôjeja'a ya nyabe jôme ba te bi.

¹³ A Nti, bo'o jam éziñ, jimbi'i besiñe bam a wu'a be si; solé'é ma vôme bikotekote bi bôt bi se nguleya kui.

¹⁴ Nkpwaté mekône wôé ô mane'e be wôé; mane'e be a wo wôé womien. Asu'ulane dap, e bevevee be bôt été, e bo'o na be bo momo ényiñ été! Bo'o na be nyu ayôle mendim mme ô bili nnaan asu dap. Bone bab be nya'a me a bili, be li'i fe *mebuka'a asu bendaé bap!

¹⁵ Ve ma, e *zôsôô été, ma ye yen asu dôé; éyoñe ma ye vee ôyo, ma ye jaé a éyeka'a jôé.